O‘zbekiston-Qozog‘iston chegarasida navbat yuzaga keldi

Qozog‘iston Milliy xavfsizlik qo‘mitasi Chegara xizmati O‘zbekiston bilan chegaradagi «Qoplonbek» o‘tkazish punktida odamlar to‘planib qolgani haqida ma’lum qildi, deb xabar berdi Kazinform.

Xabarga ko‘ra, O‘zbekistondagi «Navoiy» o‘tkazish punktida ro‘yxatga olish tizimida uzilishlar yuzaga kelgani sababli fuqarolarning bir qismi qo‘shni davlat hududiga kirishni kutishga majbur bo‘lgan.

Shu bilan birga, idora Qozog‘iston tomonidagi o‘tkazish punkti odatdagidek ishlayotganini, chegarani kesib o‘tishga hech qanday cheklov kiritilmaganini ta’kidladi.

“Qozog‘iston tomonida o‘tkazish punkti odatdagidek ishlamoqda, hech qanday cheklov kiritilmagan. Chegara vakillari doirasida hamkorlik tashkil etilgan. O‘zbekiston tomoni ma’lumotiga ko‘ra, nosozliklarni bartaraf etish va o‘tkazish punkti ish qobiliyatini tiklash bo‘yicha chora-tadbirlar olib borilmoqda”, deyiladi Qozog‘iston MXQ xabarida.

Qozog‘istonliklardan safarlarni rejalashtirishda ushbu ma’lumotni inobatga olish so‘ralgan.