O‘zbekistonda milliy messenjer ishga tushiriladi

2022–2026 yillarga mo‘ljallangan taraqqiyot strategiyasini 2022 yilda amalga oshirish bo‘yicha “Yo‘l xaritasi” loyihasiga ko‘ra, milliy ijtimoiy tarmoq va messenjerlar hamda axborot kommunikatsion dasturlar yaratish mo‘ljallangan.

Bunda, sohaning yetuk mutaxassislari va yirik tadbirkorlarni milliy kommunikatsiya platformalarini yaratishga jalb qilish, ma’lumotlarni uzatish va qayta ishlashning zamonaviy  talablariga mos dasturiy ta’minot va texnik vositalar bilan ta’minlash ko‘zda tutiladi.

Shuningdek, AKT sohasida milliy mahsulot yaratish tizimini rag‘batlantirish va qo‘llab-quvvatlashning samarali mexanizmlarini ishlab chiqish rejalashtirilgan.

Bunda, yaratilgan dastur hamda milliy ijtimoiy tarmoq va messenjerlar auditoriyasining qamrovi ortishiga qarab soliq imtiyozlari berish tizimi yo‘lga qo‘yiladi.

Milliy kommunikatsiya platformalari aholi orasida ommalashtiriladi. Bunda, milliy ijtimoiy tarmoq va messenjerlarni zamonaviy dizayn hamda texnik talablar asosida yangilab borishni yo‘lga qo‘yish, aholi o‘rtasida milliy ijtimoiy tarmoq va messenjerlar targ‘iboti bo‘yicha amaliy choralar ko‘rish, fuqarolarning shaxsiy ma’lumotlari xavfsizligini ta’minlash mo‘ljallangan.