19:51 / 18.04.2020
46234

«Navoiyazot» rahbari ishdan ketdi

Respublikadagi gigant korxonalardan biri bo‘lmish «Navoiyazot» AJda rahbar o‘zgardi.

Foto: Prezident matbuot xizmati

«Navoiyazot» AJ boshqaruv raisi Bahodir Sharipov boshqa ishga o‘tganligi munosabati bilan lavozimidan ozod etilgan. Kompaniya matbuot xizmati xabar berishicha, endilikda jamiyat raisligi vazifasini bajarish «O‘zkimyosanoat» AJ boshqaruv raisining birinchi o‘rinbosari Odil Temirovga yuklatilgan.

«O‘zkimyosanoat» AJ matbuot xizmati xabar berishicha, 18 aprel kuni «Navoiyazot» aksiyadorlik jamiyatida «O‘zkimyosanoat» AJ boshqaruv raisi Jo‘rabek Mirzamahmudov rahbarligida yig‘ilish bo‘lib o‘tdi. Unda 16 aprel kuni prezident Shavkat Mirziyoyev raisligida o‘tkazilgan, kimyo, agrotexnika va avtomobil sanoati korxonalarida ishlab chiqarish sur'atlarini ta'minlash hamda yangi loyihalarni amalga oshirish masalalari bo‘yicha videoselektor yig‘ilishida ta'kidlangan masalalar yuzasidan «O‘zkimyosanoat» AJ va tashkilot tizmidagi korxonalar tomonidan amalga oshirilishi lozim bo‘lgan vazifalar ijrosi muhokama qilingan.

«Navoiyazot» AJ boshqaruv raisi Bahodir Sharipov boshqa ishga o‘tgani sababli jamiyat raisligi vazifasini bajarish «O‘zkimyosanoat» AJ boshqaruv raisining birinchi o‘rinbosari Odil Shukurovich Temirovga yuklatilgan. Odil Temirov bir vaqtning o‘zida «O‘zkimyosanoat»dagi lavozimini ham saqlab qoladi.

«Jo‘rabek Mirzamahmudov yaqin bir oyda «Navoiyazot» aksiyadorlik jamiyatidagi polivinilxlorid korxonasi quvvatini 90 foizga yetkazish, azot kislotasi ishlab chiqarish loyihasini foydalanishga topshirish vazifasini amalga oshirish yuzasidan aniq chora-tadbirlar rejasini ishlab chiqish hamda amaliyotga tatbiq etish lozimligi haqida bildirdi.

Shuningdek, hozirgi epidemiologik vaziyat bois tozalash va dezinfeksiya vositalariga talab oshganligi, xususan, qo‘shni davlatlardan 2 ming tonna gipoxloritga buyurtma kelib tushganligi hamda tog‘-kon metallurgiya sanoati uchun muhim bo‘lgan sianid tuzlariga ham ehtiyoj ortayotganligi bois imkoniyatlarni to‘liq safarbar etish orqali ishlab chiqarish hajmini oshirish, mavjud quvvatlarni modernizatsiya qilishga qaratilgan yangi loyihalar tayyorlash yuzasidan berilgan ko‘rsatmalar ijrosiga e'tibor qaratish lozimligi ham ta'kidlab o‘tildi», deyiladi «O‘zkimyosanoat» AJ matbuot xizmati xabarida.

«Navoiyazot» aksiyadorlik jamiyatida ayni kunda qariyb 9 ming ishchi-muhandis mehnat qiladi va ularning 2,5 ming nafarini yoshlar tashkil qiladi. 1964 yilda ishga tushgan gigant korxonada 70 turdan ortiq mahsulot ishlab chiqariladi.

Top