14:51 / 09.06.2020
11855
Eronda MRBga general Sulaymoniy haqida ma'lumot berganlikda gumon qilingan fuqaro o‘limga hukm qilindi

Qosim Sulaymoniy 2020 yilning 3 yanvar kuni Iroq poytaxti Bag‘dodda AQSh harbiylari o‘tkazgan operatsiya natijasida o‘ldirilgandi.

Foto: Reuters

Eron hukumati MRB va Isroilning “Mossad” razvedkasi bilan hamkorlik qilish hamda general Qosim Sulaymoniyning manzili haqida ma'lumot berishda gumonlangan fuqaroni o‘limga hukm qildi. Bu haqda Eron oliy sudi vakili G‘ulom Husayn Ismoiliy ma'lum qildi.

“Mahmud Musoviy Majd MRB va “Mossad” bilan aloqada bo‘lgan va dollar evaziga Islom inqilobi muhofizlari korpusi ortidan josuslik bilan shug‘ullangan”, - deya uning so‘zlaridan iqtibos keltirmoqda Mehr agentligi. 

Ismoiliyning qo‘shimcha qilishicha, u “dushmanlarga Sulaymoniyning qayerdaligi haqida ma'lumot bergan”.

Uning so‘zlariga ko‘ra, “Majd o‘lim jazosiga hukm qilingan va hukm tez orada ijro etiladi”.

Eslatib o‘tamiz, Qosim Sulaymoniy 2020 yilning 3 yanvar kuni Iroq poytaxti Bag‘dodda AQSh harbiylari o‘tkazgan operatsiya natijasida o‘ldirilgandi.

Mavzu
Qosim Sulaymoniyning o‘ldirilishi
Eron tashqi siyosati bunyodkori, Yaqin Sharq bo‘yicha bosh strategi, Eron Islom inqilobi muhofazasi korpusi tarkibidagi «Kuds» maxsus bo‘linmasi qo‘mondoni Qosim Sulaymoniy Bag‘doddagi aeroportda AQSh prezidenti Donald Tramp farmoyishiga binoan o‘ldirildi.
Barchasi
Top