19:29 / 27.03.2021
10637

4-sinf bitiruvchilarini fanlar bo‘yicha ixtisoslashgan sinflarga saralab olish mexanizmi tasdiqlandi

Umumta'lim maktablarining ixtisos-sinflariga o‘quvchilarni saralash mezonlari ixtisoslashgan maktablarga o‘qishga qabul qilish mezonlari bilan bir xil bo‘ladi.

O‘zbekistonda umumiy o‘rta ta'lim maktablari 4-sinf bitiruvchilarini fanlar bo‘yicha ixtisoslashtirilgan sinflarga saralab olish tizimi joriy etiladi.

26 mart kuni bu haqda Ta'lim inspeksiyasi, Davlat test markazi, Xalq ta'limi vazirligi hamda Prezident, ijod va ixtisoslashtirilgan maktablarni rivojlantirish agentligining qo‘shma qarori qabul qilindi.

Qaror bilan, 4-sinf bitiruvchilari o‘qishni kelgusida ixtisoslashgan sinflarda davom ettirishi uchun saralab olish tizimi va ixtisoslashgan sinflarni tashkil etish mezonlari tasdiqlandi.

Belgilanishicha, o‘quvchilarning qiziqishi va qobiliyatlarini inobatga olgan holda, ixtisoslashgan sinflar quyidagicha tashkil etilishi mumkin:

  • o‘quvchilarning aql-idrok darajasi va erishgan natijalari asosida muayyan fanlarga ixtisoslashgan doimiy sinflar;
  • o‘quvchilarning qobiliyati va qiziqishidan kelib chiqqan holda muayyan fan doirasida turli sinflardan guruhlar ko‘rinishida jamlanadigan o‘zgaruvchan sinflar.

O‘rta maktablarning 4-sinf bitiruvchilarini fanlar bo‘yicha saralash va yo‘naltirish – o‘quvchilarning qiziqishi va mayllarini aniqlash bo‘yicha Respublika tashxis markazi ishlab chiqqan psixologik-pedagogik diagnostika metodikalaridan foydalangan holda amalga oshiriladi.

Fanlar bo‘yicha ixtisoslashgan sinflarga hujjatlarni qabul qilish, rasmiylashtirish, tegishli fanlardan sinovlar o‘tkazish va o‘quvchilarni ixtisoslashgan sinfdan chetlatish – XTV va DTM 2011 yil 26 dekabrda tasdiqlagan Ayrim fanlar chuqur o‘rganiladigan davlat umumta'lim muassasalarining ixtisoslashtirilgan sinflariga, davlat ixtisoslashtirilgan umumta'lim muassasalariga o‘quvchilar qabul qilish tartibi to‘g‘risidagi nizomi asosida amalga oshiriladi.

Fanlar bo‘yicha ixtisoslashgan sinflarning yo‘nalishlari ro‘yxatini XTV va Ta'lim inspeksiyasi belgilaydi.

Fanlar bo‘yicha ixtisoslashgan sinflar tashkil etish imkoniyati bo‘lmagan maktablarda maxsus fan to‘garaklari yo‘lga qo‘yiladi.

Top