Yakka tartibda o‘qitiladigan o‘quvchilarga dars berganlik uchun yo‘l kompensatsiyasi to‘lanadi

Hukumat qarori (740-son, 24.11.2025 y.) bilan Vazirlar Mahkamasining ayrim qarorlariga o‘zgartirish va qo‘shimchalar kiritildi.

Kiritilgan qo‘shimchalarga ko‘ra, uyda yakka tartibda o‘qitiladigan o‘quvchilarni, shu jumladan, bir xil yoshdagi va bir manzilda istiqomat qiluvchi 2 va undan ortiq o‘quvchilarni o‘qitganlik uchun maktab o‘qituvchilariga bazaviy hisoblash miqdorining 1 baravari miqdorida oylik yo‘l kompensatsiyasi to‘lanadi.

Kompensatsiya quyidagi shartlar asosida amalga oshiriladi:

• maktabdan o‘quvchining yashash joyigacha masofa kamida 1,5 kilometr bo‘lganda;
• o‘quvchiga biriktirilgan bir nechta o‘qituvchilarga kompensatsiya ularning har oyda amalda o‘tkazadigan o‘quv soatlari ulushidan kelib chiqib, uyda o‘qitilayotgan o‘quvchining o‘quv rejasidagi o‘quv soatlari miqdoriga mutanosib ravishda to‘lanadi.

Shuningdek, qarorda davlat maktabgacha ta’lim tashkiloti tarbiyachisi hamda tibbiyot hamshiralari vaqtincha ishda bo‘lmagan davrda ularning vazifasini bajarish uchun ichki buyruqlar o‘rindoshlik asosida rasmiylashtirilishi belgilandi.

Bunda bajarilgan ish uchun:

• tarbiyachi va tibbiyot hamshiralari uchun — 100 foiz miqdorda;
• boshqa lavozimlar uchun — 50 foiz miqdorda ish haqi to‘lanadi.

Mazkur holatda o‘rindoshlik asosida faoliyat yuritgan xodimning jami ish yuklamasi 1,5 stavkadan ortiq bo‘lishiga yo‘l qo‘yilmaydi.