Surxondaryoda 9-sinf o‘quvchisi 11-sinf o‘quvchisi tomonidan zo‘rlangani aytilmoqda

Ijtimoiy tarmoqlarda Surxondaryo viloyati Denov tumanidagi 64-umumiy o‘rta ta’lim maktabida o‘quvchilar o‘rtasida jinsiy zo‘ravonlikka oid holat yuz bergani haqida xabarlar tarqaldi. Ma’lum qilinishicha, maktabning 11-sinf o‘quvchisi shu ta’lim muassasasida o‘qiydigan 9-sinf o‘quvchisiga nisbatan jinsiy zo‘ravonlik sodir etgan.

Viloyat Maktabgacha va maktab ta’limi boshqarmasiga ko‘ra, mazkur holat bir necha oy avval maktab hududidan tashqarida va o‘quv jarayonidan tashqari vaqtda sodir bo‘lgan. Hodisa tafsilotlari maktab ma’muriyati tomonidan o‘rganilib, ota-onalar ishtirokida muhokama qilingan va tegishli tartibda ichki ishlar organlariga xabar berilgan.

“Voqea voyaga yetmaganlar ishtirokida sodir bo‘lgani sababli ish materiallari vakolatli organlar tomonidan amaldagi qonunchilik doirasida o‘rganilmoqda va huquqiy baho berilmoqda”, - deyiladi rasmiy ma’lumotda.

Bolalar ombudsmani Kun.uz’ga mazkur holat bo‘yicha tergovga qadar tekshiruv ishlari olib borilayotganini aytdi.

“Tergov organi holat yuzasidan tergovga qadar tekshiruv olib bormoqda. Bolalar ombudsmani bu borada o‘z kuzatuvini olib boryapti. Bola manfaatlariga ko‘ra, hozirda ish holatlarini batafsil ochiqlash maqsadga muvofiq emas”, deyiladi ombudsman ma’lumotida.