Samarqand shahrida keksa kishining yuziga tepib qochgan yigit va uning sherigini maxsus ta’lim-tarbiya muassasasiga joylashtirish uchun sudga iltimosnoma kiritilgan. Ularning ota-onasi esa jarimaga tortilgan. Bu haqda viloyat IIB axborot xizmati xabar bermoqda.
Voqea 2022 yil 24 yanvar kuni soat 19:00 larda sodir bo‘lgan. Samarqand shahridagi Qo‘shchinor mahallasida yashovchi 2007 yilda tug‘ilgan O‘.A. o‘z mahalladoshi, 1968 yilda tug‘ilgan fuqaro F.R.ning yuz qismiga, tepib hodisa joyidan qochib ketgan. Ushbu jarayonni O‘.A.ning tanishi bo‘lmish 2006 yilda tug‘ilgan R.K. tasvirga olib, ijtimoiy tarmoqlarda tarqatgan.
Qayd etilishicha, holat yuzasidan voyaga yetmagan O‘.A. va R.K.ning ota-onasiga nisbatan o‘rnatilgan tartibda hujjatlar rasmiylashtirilgan. Ular Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) asosan jarimaga tortilgan.
O‘.A. va R.K.ga nisbatan Respublika o‘g‘il bolalar ta’lim-tarbiya muassasasiga joylashtirish uchun Jinoyat ishlari bo‘yicha Samarqand shahar sudiga iltimosnoma kiritilgan. Hozirda ular vaqtinchalik saqlash uchun Samarqand viloyatidagi voyaga yetmaganlarga ijtimoiy yordam ko‘rsatish markaziga joylashtirilgan.
