Samarqandda chinorlar kesildi: rasmiylar daraxtlar umrini o‘tab bo‘lganini iddao qilmoqda

Samarqand viloyati Ekologiya va atrof-muhitni muhofaza qilish hamda iqlim o‘zgarishi boshqarmasi munosabat berib, ushbu chinorlar ko‘p yillar davomida tashqi ta’sirlar sabab mustahkamlik xususiyatini yo‘qotgani, tanasida g‘ovaklar paydo bo‘lgani va yo‘l tomon 40 darajaga og‘ib qolganini ma’lum qildi. Rasmiylarga ko‘ra, ularning aholi va turistlar uchun xavfli ahvolda qolishi ehtimoliy fojiali holatlarni keltirib chiqarishi mumkin.

Boshqarmaning ma’lumot berishicha, chinorlarni kesish uchun belgilangan tartibda litsenziya ham olingan. 22 avgust kuni chiqarilgan ruxsatnoma asosida Samarqand shahar hokimligi Obodonlashtirish boshqarmasi arizasi va Favqulodda vaziyatlar boshqarmasi xatiga tayanilgan holda ushbu qaror qabul qilingan.

Hujjatga ko‘ra, kesilgan har bir chinor o‘rniga qimmatli turdan bo‘lgan 10 ta daraxt ko‘chati ekilishi va ikki yil davomida parvarish qilinishi shart qilib belgilangan. Mazkur ishlarni amalga oshirish mas’uliyati Samarqand shahar hokimligi Obodonlashtirish boshqarmasi zimmasiga yuklatilgan.

Ekologiya boshqarmasi yaqin kunlarda yangi chinor ko‘chatlari ekilishi va Amir Temur maqbarasi atrofida yashil hudud tiklanishini ma’lum qildi.