Nyu-York metrosida otishma keltirib chiqarishda gumon qilingan 62 yoshli shaxs hibsga olish jarayonida qarshilik ko‘rsatmagan. Hodisada yaralangan 23 kishidan 10 nafari o‘qdan jarohat olgan.
Nyu-York metrosida kamida 23 kishi jarohat olgan otishma sodir bo‘lgan kunning ertasiga politsiya gumonlanuvchi shaxsni qo‘lga oldi. «Biz uni ushladik», dedi Nyu-York meri Erik Adams 13 aprel, chorshanba kuni bo‘lib o‘tgan matbuot anjumanida.
Mahalliy politsiya boshlig‘i Kichant Syuellning so‘zlariga ko‘ra, 62 yoshli Frenk Jyeyms ko‘chada qo‘lga olingan va qarshilik ko‘rsatmagan. Unga jamoat transportida «terroristik yoki boshqa zo‘ravonlik hujumi» moddasi bo‘yicha ayblov qo‘yilgan. Gumonlanuvchi 14 aprel, payshanba kuni sudga chaqirilishi rejalashtirilgan. Uning harakatlariga nima sabab bo‘lgani noma’lumligicha qolmoqda.
12 aprel kuni ertalab, tig‘iz vaqtda metro yo‘lovchilaridan biri gazga qarshi niqob taqib olib, ikkita kanistrni ochgan va undan tutun chiqqach, poyezdda otishma keltirib chiqargan, so‘ngra uni Nyu-Yorkning Bruklin tumani hududidagi «36-ko‘cha» bekati platformasida davom ettirgan. 10 kishi o‘qdan yaralangan, yana 13 kishi tutundan zaharlangan yoki qochish paytida jarohat olgan.
Gumonlanuvchi Frenk Jyeyms avvalroq Nyu-York va Nyu-Jyersi shtatlari politsiyasi tomonidan jinsiy zo‘ravonlik, buzib kirish vositalariga egalik qilish va jamoat tartibini buzish kabi ayblovlar bo‘yicha 12 marta qo‘lga olingan. Agar aybi isbotlansa, u umrbod qamoq jazosiga hukm qilinadi.
