Ijtimoiy tarmoqlarda Jizzax viloyati Zomin tumani hududida ayiq ikki nafar fuqaroning umriga zomin bo‘lgani hamda ayiq ovchilar tomonidan o‘ldirilgani haqida xabar tarqaldi.
Davlat ekologiya qo‘mitasi mazkur holat yuzasidan tezkor o‘rganish o‘tkazdi va ushbu xabar yolg‘on ekani ma’lum bo‘ldi.
Ijtimoiy tarmoqlarda shov-shuvlarga sabab bo‘layotgan holat aslida Rossiyaning Baykalorti o‘lkasida sodir bo‘lgani aniqlandi. Bu haqda Amur oblasti Hayvonot dunyosini muhofaza qilish boshqarmasi mas’ul xodimlari tomonidan rasmiy munosabat bildirilgan.
Davlat ekologiya qo‘mitasi fuqarolardan bu kabi noto‘g‘ri ma’lumotlarga ishonmaslikni so‘ragan va O‘zbekiston qonunchilik hujjatlariga muvofiq yolg‘on xabarlar tarqatish javobgarlikka tortilishi mumkinligi haqida eslatib o‘tgan.
Ma’lumot uchun, 2020 yilning avgust oyi oxirlarida Jizzax viloyati Baxmal tumanida Qizil kitobga kiritilgan ayiq noma’lum kishilar tomonidan qo‘yilgan qopqonga tushib qolgandi.
