Gazlidagi konlar “O‘zbekneftgaz”da qoladigan bo‘ldi

Gazli hududidagi konlarda uglevodorod qazib chiqarish hajmlarini oshirish bo‘yicha “muhim strategik qaror” qabul qilindi, deya xabar berdi “O‘zbekneftgaz” kompaniyasi.

Bu qarorga ko‘ra, avval hamkorlar tomonidan amalga oshirilishi rejalashtirilgan Gazli hududidagi 21 ta kon bo‘yicha loyiha endilikda “O‘zbekneftgaz”ning o‘z kuch va moliyaviy resurslari hisobidan amalga oshiriladi.

“Loyiha doirasida zamonaviy texnologiyalarni joriy etish, qo‘shimcha burg‘ilash uskunalarini jalb qilish, yer usti kompressor stansiyalarini o‘rnatish, shuningdek, zarur moddiy-texnik resurslarni xarid qilish orqali qazib chiqarish jarayonlarini jadallashtirish ko‘zda tutilgan”, – deyiladi xabarda.

Ikki hafta oldin “O‘zbekneftgaz” AJ va Xitoyning United Energy Group Limited kompaniyasi rahbarlari o‘rtasida uchrashuv bo‘lib o‘tgan edi.

“O‘zbekneftgaz” xabariga ko‘ra, muloqotda Gazli hududida joylashgan konlarda uglevodorodlar qazib olish hajmlarini oshirishga qaratilgan qo‘shma loyihaning joriy holati va uni amalga oshirish sur’atlari muhokama qilingan.

“Muzokaralar davomida tomonlar loyihaning samarali va barqaror ijrosini ta’minlashga qaratilgan strategik yo‘nalishlar, zamonaviy texnologik yechimlar hamda moliyaviy-iqtisodiy masalalarni atroflicha muhokama qildilar.

Uchrashuv yakunida tomonlar qo‘shma loyihani amalga oshirish ishlarini yanada jadallashtirish, o‘z vaqtida belgilangan ko‘rsatkichlarga erishish hamda keyingi bosqichdagi harakatlarni aniq rejalashtirish muhimligini ta’kidladilar”, – deyilgandi rasmiy axborotda.

Eslatib o‘tamiz, 2025 yil dekabr oyi o‘rtalarida “O‘zbekneftgaz”ga Abdug‘ani Sanginov rais etib tayinlangan, o‘shanda bosh vazir o‘rinbosari Jamshid Qo‘chqorov gaz qazib chiqarishni oshirish uchun ajratilgan katta mablag‘larga qaramay, kutilgan natijalarga erishilmayotganini tan olgandi. Oradan 1 oy o‘tib, Sanginov prezident huzuridagi yig‘ilishda ham gaz qazib chiqarishni oshirish topshirig‘ini oldi.