Rossiya Finlandiyaning to‘qqiz diplomatini persona non grata deb e’lon qildi

Finlandiyaning Rossiyadagi elchisi Antti Helanterya Rossiya Tashqi ishlar vazirligiga chaqirildi, «unga qarshi keskin norozilik bildirildi». Finlandiyaning Moskvadagi elchixonasi va Sankt-Peterburgdagi Finlandiya bosh konsulligining 9 nafar xodimi persona non grata deb e’lon qilindi. Bu haqda 6 iyul, payshanba kuni Rossiya tashqi ishlar vazirligi ma’lumot berdi.

Shuningdek, Moskva 1 oktyabrdan boshlab «Finlandiyaning Sankt-Peterburgdagi Bosh konsulligi faoliyatiga» berilgan rozilikni qaytarib olishga qaror qildi», — deyiladi TIV xabarida.

Finlandiya tomoniga Rossiya Tashqi ishlar vazirligining tegishli diplomatik notalari topshirildi.

Moskva Finlandiyaning NATOga kirish parametrlari Rossiya Federatsiyasi xavfsizligiga tahdid soladi, deb hisoblaydi, shuningdek, Helsinkini Kiyevni qurol-yarog‘ bilan qo‘llab-quvvatlayotganlikda, «Rossiyaga qarshi qarama-qarshi siyosatda» va ruslarga viza berishdagi to‘siqlarda aybladi.

Iyun oyida Finlandiyadan Rossiya tashqi missiyalarining 9 nafar vakili chiqarib yuborildi.

Finlandiya Rossiyaning Ukrainadagi urushi munosabati bilan sanksiyalar ostidagi rus oligarxlari va boshqa shaxslarning aktivlarini faol ravishda muzlatib qo‘ymoqda. Aprel oyi oxirida 1710 nafar jismoniy yoki yuridik shaxsning 244 million yevro miqdoridagi aktivlari muzlatib qo‘yildi, deya qayd etdi Helsingin Sanomat.

17 may kuni Finlandiya Tashqi ishlar vazirligi Rossiya Finlandiya diplomatik vakolatxonalari bank hisoblarini muzlatib qo‘yganini ma’lum qildi. Gap Finlandiyaning Moskvadagi elchixonasi va Sankt-Peterburgdagi Bosh konsulligi haqida boryapti. Tashqi ishlar vaziri Pekka Haavistoning aytishicha, Finlandiya Rossiyaga nota yuborgan.