Etihad Airways O‘zbekistonga parvozlarni yo‘lga qo‘yadi

Etihad Airways aviakompaniyasi BAA poytaxti Abu-Dabi shahridan Fors ko‘rfazi, Yevropa, Kavkaz va Markaziy Osiyodagi yettita yangi yo‘nalish bo‘yicha parvozlarni yo‘lga qo‘yishni rejalashtirmoqda.

Jumladan, Abu-Dabida joylashgan aviakompaniya Olmaota (Qozog‘iston), Boku (Ozarboyjon), Buxarest (Ruminiya), Madina (Saudiya Arabistoni), Tbilisi (Gurjiston), Toshkent (O‘zbekiston) va Yerevanga (Armaniston) parvozlarni yo‘lga qo‘yadi.

Chiptalar bir necha kun ichida sotuvga chiqariladi, reyslar 2026 yil mart oyida boshlanadi.

Bu e’lon Vengriyaning Wizz Air budjetli aviakompaniyasi Abu-Dabidagi faoliyatini to‘xtatayotganini, shu sababli, ko‘plab yo‘nalishlardagi aviaqatnovlar, jumladan, Toshkent va Samarqandga parvozlar to‘xtatilishini ma’lum qilganidan bir kun o‘tib yangradi.

Qayd qilinishicha, Etihad Airways 2025 yil birinchi yarmida 10,2 million yo‘lovchini tashidi, bu o‘tgan yilning shu davriga nisbatan 17 foiz ko‘p. Yil davomida o‘rindiqlar bilan bandlik darajasi o‘rtacha 87 foizni tashkil etdi.