Mers AQShning Rossiya neftiga qarshi sanksiyalarni yumshatishini qoraladi

Germaniya kansleri Fridrix Mers va Norvegiya bosh vaziri Yonas Gar Styore 13 mart, juma kuni AQShning Rossiya neftiga qarshi sanksiyalarni yumshatish qarorini keskin tanqid qildi. Mers Norvegiyaning Annyoyya orolida o‘tkazilgan muzokaralar chog‘ida shunday dedi: “Men juda aniq aytmoqchiman: hozir sanksiyalarni, qanday sabab bo‘lishidan qat’i nazar, yumshatishni biz noto‘g‘ri deb hisoblaymiz”.

Germaniya hukumati rahbari qo‘shimcha qildi: “Afsuski, Rossiya hanuzgacha muzokaralarga tayyorligini namoyon etmayapti. Shuning uchun biz Moskvaga bosimni kuchaytirishda davom etamiz”.

Uning aytishicha, bir kun avval “Katta yettilik” — G7 mamlakatlari yetakchilarining, jumladan AQSh prezidenti Donald Tramp ishtirokida videokonferensiyasi bo‘lib o‘tgan.

“G7'ning olti a’zosi bu — kerakli signal emas, degan juda aniq fikrni bildirdi”, — dedi kansler.

Fridrix Mers ta’kidlashicha, Vashingtonning Rossiyaga qarshi sanksiyalarni yumshatish qarori haqida u faqat 13 mart kuni ertalab bilgan.

“Yana takrorlayman: biz buni noto‘g‘ri deb hisoblaymiz. Hozir narxlar bilan bog‘liq muammo bor, ammo hajmlar bilan bog‘liq muammo yo‘q”, — dedi Mers.

Shu bilan birga, u AQSh ma’muriyati aynan qanday sabablardan kelib chiqqanini tushunib olishni istashini ham ta’kidladi.

Norvegiya bosh vaziri bu pozitsiyani qo‘llab-quvvatladi. Uning so‘zlariga ko‘ra, tomonlar Rossiya Ukrainaga qarshi urushni to‘xtatmayotgani uchun sanksiyalar muhim, degan fikrda yakdil.

“Rossiya energetika sohasidagi signallarga eng sezgir. Shuning uchun yumshatishni aynan shu yerdan boshlash mutlaqo noto‘g‘ri”, — dedi u.

Yonas Gar Styore qo‘shimcha qilishicha, Yevropa allaqachon aniq signal yuborgan va Rossiya energiya tashuvchilariga qaramlikdan xalos bo‘lgan.

Germaniya iqtisodiyot vaziri Katerina Rayxe AQSh sanksiyalarining yumshatilishiga nisbatan bosiq munosabat bildirdi. Uning so‘zlariga ko‘ra, bu yengilliklar “hajm jihatidan ham, vaqt jihatidan ham cheklangan”. Shunga qaramay, u bu qaror “Putinning harbiy xazinasini” to‘ldirishi mumkinligidan xavotir bildirdi.

Rayxe shuningdek, agar energiya ta’minotiga tahdid yuzaga kelsa, ayniqsa Fors ko‘rfazi mintaqasidan neft yetkazib berishga juda bog‘liq bo‘lgan Janubiy Koreya va Yaponiyadagi vaziyatni hisobga olganda, uning bahosi o‘zgarishi mumkinligini istisno qilmadi. Uning aytishicha, Germaniya hozircha bunday muammoga duch kelmayapti.

Xristian-demokratik ittifoqning tashqi siyosat bo‘yicha eksperti Roderix Kizevetter rbb24 Inforadio radiostansiyasiga bergan intervyusida AQSh qarori tufayli Rossiya “yana yaxshi pul ishlab topayotganini” aytdi.

“Agar biz qarshi choralar ko‘rmasak, bu orqali Ukraina yanada kuchli bosim ostida qoladi”, — deb qo‘shimcha qildi u.

So‘l partiya hamraisi Yan van Aken AQSh qarorini “ikki karra noto‘g‘ri signal” deb atadi. U RTL/ntv mediakompaniyasi efirida, Donald Trampni nazarda tutib, shunday dedi: “Uning o‘zi xalqaro huquqqa zid tajovuzkor urush olib bormoqda, Eronni bombalayapti. Neft narxlari osmonga chiqib ketdi. Va shunda nima bo‘ladi? U shunda xalqaro huquqqa zid Rossiya tajovuzkor urushiga befarqmiz, deydi. Ularga neft sotish mumkin. Bu dunyoga qanday signal?”

Bunga qarama-qarshi ravishda, so‘l-konservativ “Sara Vagenknext ittifoqi” partiyasi Germaniya hukumatini Rossiyadan neft xarid qilishga qayta ruxsat berishga chaqirdi. Partiya hamraisi Fabio De Mazining aytishicha, Germaniya AQShdan farqli o‘laroq, energiya tashuvchilar narxi keskin oshib borayotganiga qaramay, Rossiya nefti va gazidan voz kechishda davom etmoqda.

U shunday dedi: “Biz Shvedt orqali Rossiya neftini yana sotib olishimiz, ortiqcha foydaga soliq joriy qilishimiz va uglerod yig‘imini darhol bekor qilish orqali yonilg‘i narxlarini sezilarli darajada pasaytirishimiz kerak”.