Gepatit C aniqlangan bemorlar dorilar bilan bepul ta’minlanadi

AOKAda o‘tkazilgan brifingda Sanitariya-epidemiologik osoyishtalik va jamoat salomatligi xizmati axborot xizmati rahbari Maftuna Saidova 28 iyul – Butunjahon gepatitga qarshi kurashish kuni munosabati bilan mazkur yo‘nalishda ko‘rilayotgan chora-tadbirlar haqida ma’lumot berdi.

Joriy yilning 1 iyulidan boshlab har yili respublika aholisi skrining tekshiruvlari soni 1 million nafargacha, polimer zanjir reaksiyasi (PZR) tekshiruvlari soni 15 ming nafargacha, virusli gepatit C turi bilan kasallangan bemorlarni davolash 10 500 nafargacha yetkaziladi. 

Kasallik yuqishi xavfi yuqori bo‘lgan shaxslarni, shu jumladan qon va uning tarkibiy qismlari bilan ishlovchi tibbiyot xodimlari orasida gepatit B infeksiyasining oldini olish maqsadida emlash ishlari boshlab yuborilgan bo‘lib, 2022-2023 yil davomida 120 mingga yaqin tibbiyot xodimlari virusli gepatit V infeksiyasiga qarshi to‘liq qamrab olinishi rejalashtirilgan.