San'atkorlarning intellektual va mulkiy huquqlarini himoya qilishning yangi tizimi joriy etiladi

Hujjat bilan 2020-2021 yillarda O‘zbekiston Respublikasida madaniyat va san'atni yanada rivojlantirishga doir qo‘shimcha chora-tadbirlar dasturi hamda O‘zbekiston Respublikasida milliy madaniyatni yanada rivojlantirish konsepsiyasining 2021-2025 yillarga mo‘ljallangan maqsadli ko‘rsatkichlari tasdiqlandi.

San'atkor, ijodkor va ijrochilarning mualliflik huquqlarini himoya qilish palatasi tashkil etilmoqda. Palata mulkiy huquqlarni jamoaviy asosda boshqaradigan tashkilot hisoblanadi. Palata faoliyatini dastlabki bosqichlarda qo‘llab-quvvatlash uchun unga Madaniyat va san'atni rivojlantirish jamg‘armasi mablag‘lari hisobidan 1 mlrd so‘m ajratiladi.

Palata o‘z faoliyatini quyidagi tartibda amalga oshiradi:

huquq egalari yoki ularning merosxo‘ri tomonidan berilgan vakolat asosida mulkiy huquqlarni jamoaviy asosda boshqaradi;

foydalanuvchilar (kafelar, saytlar, radio, televideniye va h.k.) bilan asarlar va turdosh huquqlar obektlaridan foydalanish uchun shartnomalar tuzadi;

respublika va xorijiy davlatlarda ushbu faoliyatni amalga 
oshiruvchi boshqa tashkilotlar bilan ham o‘zaro hamkorlik qiladi;

foydalanuvchilardan yig‘ilgan haqni huquq egalariga taqsimlaydi (o‘z xarajatlarini chegirib qolgan holda), huquq egalariga ularning huquqlaridan foydalanilganligi to‘g‘risidagi hisobot beradi.

Palata va unga o‘xshash tashkilotlar mualliflik huquqlarini, asosan, sud orqali himoya qiladi. Shu sababli, ularning ushbu yo‘nalishdagi faoliyati samaradorligini oshirish maqsadida, mazkur turdagi da'volar uchun davlat bojidan ozod qilish taklif etilmoqda.

San'atkorlarning mualliflik huquqlarini himoya qilish bilan bog‘liq ishlar tegishliligiga ko‘ra fuqarolik va ma'muriy ishlar bo‘yicha sudlar hamda iqtisodiy sudlar tomonidan ko‘rib chiqiladi. Ushbu turdagi ishlar soni nisbatan kamligi va o‘zaro tajriba almashish zarurligi sababli, Oliy sud tomonidan muntazam ravishda sud amaliyotini umumlashtirib borish taklif etilmoqda.