Manba: Qashqadaryo viloyati rahbariyatining «to‘rtligi» ishdan olinadi

Qashqadaryo viloyati hokimi, prokurori, IIB va DSI boshliqlari ishdan olinishi kutilmoqda. Bu haqda Kun.uz manbasi xabar berdi.

Ushbu to‘rtta sektor rahbarining o‘rniga kimlar tayinlanishi haqida hozircha ishonchli ma'lumot yo‘q. Bugun Qashqadaryo viloyatida hukumat rahbarlari ishtirokida viloyat faollarining yig‘ilishi o‘tkazilishi rejalashtirilgan. Unda viloyatning ijtimoiy-iqtisodiy ahvoli jiddiy tanqid ostiga olinib, tashkiliy masalalar ko‘rilishi kutilmoqda.

Shuningdek, yig‘ilishda Qarshi shahri, Chiroqchi va Mirishkor tumanlarining amaldagi hokimlari masalasi ham ko‘rib chiqilishi mumkin.

Eslatib o‘tamiz, Zafar Ro‘ziyev 2013 yil 27 sentyabrdan buyon Qashqadaryo viloyat hokimi lavozimida ishlab kelmoqda. Botir Yusupov 2018 yil 16 yanvardan beri Qashqadaryo viloyati prokuroridir. Dilshod Tursunboyev 2016 yil 22 fevral kuni Qashqadaryo viloyati IIBning boshlig‘i etib tayinlangan bo‘lsa, Ravshanjon Nasimov 2019 yil 12 mart kuni Qashqadaryo viloyati Davlat soliq boshqarmasi boshlig‘i lavozimini egallagan.