Andijon shahridagi 4-umumta'lim maktabining 11-sinf o‘quvchisi Eldor Usmonov Tokio olimpiadasining suzish bo‘yicha musobaqalarida qatnashish huquqini qo‘lga kiritdi.
Eldor Usmonov – viloyat suv sportiga ixtisoslashgan bolalar va o‘smirlar sport maktabi tarbiyalanuvchisi.
U shu oy Toshkentda bo‘lib o‘tgan O‘zbekiston ochiq chempionatida 100 metrga batterflay usulida suzish bo‘yicha 51,83 soniya natija qayd etib, Olimpiada normativini bajardi.
«Oilamizda sportga juda qiziqishadi. Ota-onam 7 yoshimda Andijon shahridagi suv havzasiga olib borib, murabbiyim Oybek Ismoilovga topshirishdi. Uzoq yillar kuniga 4 soatdan suzish bilan shug‘ullandim.
Ustozlarimning mehnati evaziga o‘tgan hafta Toshkent shahrida bo‘lib o‘tgan O‘zbekiston ochiq chempionatida Tokio olimpiadasi yo‘llanmasiga ega bo‘ldim.
Shuni bildimki, agar inson o‘z ustida uzoq ishlasa, albatta muvaffaqiyatlarga erishadi. Barcha tengdoshlarimni sport bilan shug‘ullanishga chaqirib qolaman», – deydi Eldor.
Andijon viloyat suv sportiga ixtisoslashgan BO‘SM murabbiyi Oybek Ismoilovdan shogirdining muvaffaqiyati haqida so‘radik.
«Eldorning muvaffaqiyatidan juda xursandman. U singari yosh sportchilarning katta g‘alabalarga erishishi minglab o‘quvchilarni stadionlar, suv havzalari tomon borishlariga sabab bo‘ladi. Bu juda yaxshi», – deydi Oybek Ismoilov.
Ma'lumot uchun, 2016 yilgi Rio Olimpiadasining suzish musobaqalarida O‘zbekistonning 2 sportchisi qatnashgan bo‘lsa, 2021 yilgi Tokio Olimpiadasiga o‘zbekistonlik 5 nafar suzuvchi yo‘llanma oldi.
23 iyuldan start olishi kutilayotgan olimpiya o‘yinlarida Eldor Usmonovdan tashqari Aleksey Tarasenko, Odilbek Yusupboyev, Xurshidjon Tursunov va Vladislav Mustafin ham O‘zbekiston sharafini suzish musobaqasida himoya qiladi.
Elmurod Ermatov,
Jahongir Mahmudov
