Qoʻshimcha funksionallar
-
Tungi ko‘rinish
«Yoshlar – kelajagimiz» jamg‘armasi faoliyati davom ettiriladi, imtiyozli kredit berish esa bekor qilinadi
«Yoshlar – kelajagimiz» jamg‘armasi o‘z faoliyatini to‘xtatmaydi. Faqatgina imtiyozli kredit berish bozor qoidalari asosida Markaziy bankka o‘tgan.
Kelasi yildan boshlab yoshlarning biznes loyihalariga mablag‘ ajratish, kreditlash bozor tamoyillari asosida to‘g‘ridan to‘g‘ri tijorat banklari orqali amalga oshiriladi. Shu tufayli, jamg‘arma tomonidan yoshlarga imtiyozli kredit berish to‘xtatilgan, deb xabar bermoqda Yoshlar Ittifoqi axborot xizmati vakili.
Ta'kidlanishicha, Tadbirkorlik faoliyatini qo‘llab-quvvatlash davlat jamg‘armasi tomonidan kreditlarning foiz stavkasining ma'lum qismini qoplash uchun kompensatsiya to‘lanadi.
«2021 yildan boshlab «Yoshlar – kelajagimiz» jamg‘armasi faoliyatining qamrov darajasi yanada kengaytirilib, yoshlar tadbirkorligini qo‘llab-quvvatlash borasidagi 20 dan ortiq faoliyat turlari bilan doimiy shug‘ullanib borishi belgilangan.
«Yoshlar – kelajagimiz» jamg‘armasi tomonidan bugungi kunga qadar yoshlarning 8 ming 471ta biznes loyihalariga jami 1,8 trillion so‘m miqdorida imtiyozli kredit mablag‘lari ajratish orqali 45 mingga yaqin yangi ish o‘rni yaratilishiga erishilgan», — deyiladi Ittifoq xabarida.
Eslatib o‘tamiz, avvalroq Moliya vaziri o‘rinbosari Jamshid Abruyev «Yoshlar – kelajagimiz» jamg‘armasi masalasida munosabat bildirib, jamg‘arma tomonidan imtiyozli kreditlar berilmasligini aytib o‘tgan edi.
