Toshkent Kimyo xalqaro universiteti va Pukyong milliy universiteti o‘rtasidagi ilmiy va madaniy hamkorlik rivojlanmoqda

Toshkent Kimyo xalqaro universitetiga Koreyaning nufuzli Pukyong milliy universitetidan 50 nafar talaba va professor-o‘qituvchilar tashrif buyurdi. Ushbu tashrif ilmiy-tajriba almashinuvi, ta’lim va madaniyatlararo muloqotni rivojlantirishga bag‘ishlandi.

Tashrif davomida koreys tili yo‘nalishi talabalari bilan fikr almashinuvi bo‘lib o‘tdi, shuningdek, qizg‘in bahs-munozaralar tashkil etildi. Pukyong milliy universiteti talabalari esa Koreya madaniyatining yorqin qirralarini namoyish etish maqsadida K-POP raqslari va taekvondo chiqishlari bilan ishtirokchilarga unutilmas taassurot ulashdi.

“Kimyo xalqaro universiteti Koreyaning nufuzli TOP 1000 talikka kiradigan universitetlari bilan hamkorlikni kundan kunga rivojlantirishda davom etmoqda. Shu hamkorlik munosabati bilan Pukyong milliy universitetidan mehmonlar kelishdi. Ular bizning 3-4-kurs talabalarimiz bilan o‘zaro tilni faqat o‘rganibgina qolmasdan, uni amaliyotga joriy etishda ham hamkorligimiz yanada mustahkamlandi. Hamkor universitetlardan nafaqat vakillar keldi, balki u yerda tahsil oladigan 50 nafar talabalar ham kelishdi. Ular bizning talabalar bilan o‘zaro muloqotga kirishishdi. Ular o‘rtasida turli intellektual o‘yinlar, birgalikda milliy taomlar tayyorlashni amalga oshirishdi. O‘rganilgan tilni amaliyotda tatbiq etishda bu muhim sanaladi. Shuning uchun biz hamkor universitetlarni kengaytirishni, ular bilan 2+2, 3+1 dasturlari yoki bir semestrli o‘quv dasturlarini ham qo‘lga kiritib, ayni paytda 8 nafar talabamiz ketishga shay”, - deb ta’kidladi Koreys filologiyasi kafedrasi mudiri Durdona Ergasheva.

Madaniy almashinuv faqat san’at bilan cheklanib qolmadi – talabalar Janubiy Koreyaning mashhur milliy taomlaridan biri kimpap tayyorlash bo‘yicha mahorat darsida ishtirok etishdi.

“O‘zbekistonga kelish, ayniqsa Toshkent Kimyo Xalqaro universiteti talabalari bilan bugungi madaniy almashinuvda ishtirok etish imkoniyatiga ega bo‘lganimdan juda xursandman. Uchrashuv iliq va samimiy muhitda o‘tdi, bu esa menda unutilmas taassurot qoldirdi.

Bugungi tadbirda ham barchaning ishtiyoq bilan qatnashayotganini ko‘rib, bu almashinuv naqadar qimmatli ekanini yana bir bor his qildim”, deydi mehmon talabalardan biri.

Bunday tadbirlar talabalar uchun nafaqat chet tillarni o‘rganishga ilhom beradi, balki ularning dunyoqarashini kengaytiradi, madaniyatlararo muloqot ko‘nikmalarini rivojlantiradi va xorijiy universitetlar bilan mustahkam aloqalar o‘rnatishiga xizmat qiladi.

Web-page | Telegram | Facebook | Instagram

Telefon: + 998 78 129 40 40

Reklama huquqi asosida