Iqtidorli yosh xotin-qizlarni aniqlash bo‘yicha yangi mexanizm joriy etiladi

Mahalla va oilani qo‘llab-quvvatlash vazirligi, Maktabgacha ta'lim vazirligi, Xalq ta'limi vazirligi, Oliy va o‘rta maxsus ta'lim vazirligi, Yoshlar ishlari agentligining 2022 yildan boshlab iqtidorli yosh xotin-qizlarni aniqlash, ularning qobiliyatlarini to‘g‘ri yo‘naltirish bo‘yicha “Oila – mahalla – maktabgacha ta'lim – o‘rta ta'lim– o‘rta maxsus ta'lim – oliy ta'lim”  hamkorlik mexanizmlarini joriy etish haqidagi takliflari ma'qullanadi.

Quyidagilarni nazarda tutuvchi:

a) Iqtidorli yosh xotin-qizlarni aniqlash, ularning qobiliyatlarini to‘g‘ri yo‘naltirish va rahbarlik lavozimlariga tavsiya etish tartibi to‘g‘risidagi nizom:

• mahallalar va ta'lim muassasalarida iqtidorli yosh xotin-qizlarni aniqlash tartibi;
• iqtidorli yosh xotin-qizlarning iqtidor va qobiliyatlari, qiziqishlarini to‘g‘ri yo‘naltirish va ro‘yobga chiqarish tartibi;
• iqtidorli yosh xotin-qizlarni rahbarlik lavozimlariga tavsiya etish tartibi;

b) Iqtidorli yosh xotin-qizlarni aniqlash, ularning qobiliyatlarini to‘g‘ri yo‘naltirish va rahbarlik lavozimlariga tayyorlashni tashkil etish bo‘yicha chora-tadbirlar dasturi tasdiqlanadi.

Prezident huzuridagi Davlat xizmatini rivojlantirish agentligi tomonidan mutasaddi vazirlik va idoralar bilan birgalikda iqtidorli yosh xotin-qizlarni rahbarlik lavozimlariga tayyorlash va tavsiya etish qonun hujjatlarida belgilangan tartibda amalga oshiriladi.

Respublika va hududiy xotin-qizlar jamoatchilik kengashlari, Mahalla va oilani qo‘llab-quvvatlash vazirligining respublikada har yili mart oyining birinchi haftaligini “Xotin-qizlarni e'zozlash haftaligi” deb e'lon qilish, vazirlik va idoralar, xo‘jalik birlashmalari va ta'lim muassasalarida xotin-qizlar masalalari bo‘yicha maslahat kengashlarini tashkil etish haqidagi takliflari ma'qullanadi.

Belgilab qo‘yilishicha:

• “Xotin-qizlarni e'zozlash haftaligi” har yili ishlab chiqilgan dasturlar va rejalar asosida barcha vazirlik va idoralarda, xo‘jalik birlashmalarida, mahallalarda, ayniqsa olis va chekka hududlardagi fuqarolar yig‘inlarida keng nishonlanadi;
• vazirlik va idoralar, xo‘jalik birlashmalari va ta'lim muassasalarida xotin-qizlar masalalari bo‘yicha maslahat kengashlarining raislari jamoatchilik asosida birinchi rahbarlarning xotin-qizlar bo‘yicha maslahatchilari hisoblanadi.