Navoiy viloyatining sobiq hokimi operatsiya qilindi

Navoiy viloyatining sobiq hokimi Qobul Tursunov 10 soat davom etgan jarrohlik amaliyotini boshdan kechirdi.

Kun.uz manbasiga ko‘ra, sobiq hokimda intubatsion narkoz ostida laminektomiyasi va bel sohasi umurtqalarini TPF - trans pedikulyar fiksator sistema bilan stabilizatsiya qilish jarrohlik amaliyoti o‘tkazilgan.

Amaliyot Navoiy viloyati Ko‘p tarmoqli tibbiyot markazida Respublika ixtisoslashtirilgan neyroxirurgiya ilmiy-amaliy tibbiyot markazi direktori o‘rinbosari, tibbiyot fanlari doktori Ravshan Yuldashev va navoiylik neyrojarrohlar hamkorligida amalga oshirilgan.  

Ta'kidlanishicha, hozirda bemorning ahvoli qoniqarli, keyingi reabilitatsiya muolajalari davom ettirilmoqda.

Qobul Tursunov 2021 yilning 8 noyabr kuni sog‘ligi yomonlashgani sababli vazifasidan ozod etilgandi. Keyinchalik sobiq hokim shu kuni farmoyish chiqarib, bir qator tashkilotlarga jami 22 mlrd 491 mln so‘m mablag‘ ajratgani ma'lum bo‘ldi.