Твердаги авиаҳалокат жойидан кадрлар ва Бахмутдаги миномётчилар. Уруш суратлари

Украинада урушнинг 546-куни ўтди. Асосий маълумотлар:

• Твер областида Евгений Пригожинга тегишли бизнес-жет ҳалокатга учради. Бортда бўлган ўн кишининг барчаси ҳалок бўлган. Росавиация «Вагнер» ХҲК раҳбари ҳам самолёт бортида бўлганини билдирган.
• Украина қуролли кучлари Запорижжя областидаги Работине қишлоғи озод этилганини эълон қилди.
• Украина ҚК авиабазасига россияликларнинг Ми-8 вертолёти қўнди. «Украинская правда»нинг тасдиқлашича, унинг пилоти разведка томонидан оғдириб олинган.
• Reuters: Россия авиакомпаниялари санкцияларни четлаб ўтган ҳолда самолётлар учун бир миллиард доллардан ортиқ қийматдаги эҳтиёт қисмларни қўлга киритган.
• Украина разведкаси Қримда портлаш оқибатида Россиянинг С-400 комплекси йўқ қилингани ҳақида маълум қилди.
• Суми областида дрон зарбаси оқибатида мактаб ходимлари бўлган тўрт киши ҳалок бўлди.
• Москва-Ситидаги бинолардан бирига дрон келиб урилди. РФ мудофаа вазирлигига кўра, яна иккита дрон Москва области ҳудудида уриб туширилган.
• РИА Новости маълумотига кўра, Сергей Суровикин ўрнига Виктор Афзалов РФ ҳаво-космик кучлари қўмондони этиб тайинланган.

Путин Ҳаага суди ордери туфайли BRICS саммитида видеоалоқа орқали қатнашди

Июл ойида Владимир Путин ЖАРдаги BRICS саммитида шахсан иштирок этишдан бош тортганди, чунки Ҳаагадаги Халқаро жиноят суди уни ҳибсга олишга ордер берганди, ЖАР эса ушбу суд қарорларини бажариш мажбуриятини олган. Натижада Россия делегациясига ташқи ишлар вазири Сергей Лавров раҳбарлик қилди. Путин ҳам 22 август кунги Йоҳаннесбург саммитида иштирок этди — видеоалоқа орқали. Кремл пулидаги журналистларнинг хабар беришича, президентнинг бизнес-форумдаги мурожаати ўзгартирилган овоз билан берилган. Нега бундай бўлгани маълум эмас.

Евгений Пригожиннинг ўлдирилиши

24 август тонгига келиб ҳам Евгений Пригожиннинг ўлими тўғрисида расмий маълумот йўқ. Шу билан бирга BBC рус хизматининг олти нафар суҳбатдоши Твер областида қулаб тушган самолёт йўловчилари рўйхатида қайд этилган «Вагнер» ХҲК раҳбарининг ўлимини «у ёки бу кўринишда» тасдиқлаган. 23 август куни кечқурун Пригожин ва вагнерчилар командири Дмитрий Уткиннинг ўлими ҳақида «Вагнер» ХҲКга яқин бўлган Grey Zone телеграм-канали ҳамда Кремл таъсиридаги «Царьград» телеканали хабар берганди. Пригожинга тегишли бўлган Embraer Legacy 600 самолёти ҳалокатга учраган жойда ўн киши жасади қолдиқлари аниқланган.

Тергов қўмитасининг Ғарбий минтақалараро тергов бошқармасидаги манба «Коммерсант»га маълум қилишича, ҳозирча теракт ҳақида иш очиш учун ҳеч қандай асослар йўқ. Самолёт қулаганидан кейин РФ Тергов қўмитаси ҳаракат хавфсизлиги ва ҳаво транспортидан фойдаланиш қоидаларини бузиш (РФ ЖК 263-модда) бўйича жиноий иш қўзғатган. РБК нашрининг ҳуқуқ-тартибот органларидаги манбаси терговчилар барча эҳтимолий версияларни, жумладан, «учувчининг хатоси, техник носозлик ва ташқи таъсир» омилларини ҳам кўриб чиқаётгани ҳақида айтган. Ғарблик мулозимлардан бири шахси сир қолиши шарти билан Financial Times нашрига, ундаги маълумотларга кўра, самолёт Россиянинг зенит-ракета тизими орқали уриб туширилгани ҳақида айтган. У бу маълумотни қаердан олганига аниқлик киритмаган.

Россия нашрларида тарқалган сўнгги хабарларга кўра, Пригожинга тегишли самолётда портловчи қурилма шасси бўлмасига ўрнатилган бўлгани версияси ҳам кўриб чиқилмоқда. Айнан шасси ҳудудида осмонда портлаш рўй берган ва бунинг натижасида самолётнинг қаноти узилиб кетган ва унинг парчалари қуйруқдаги стабилизаторга бориб урилган. Бунинг натижасида бизнес-жет кескин баландаб, сўнгра айланганича ерга қулаб тушган.

Москва-Ситида яна дрон портлаши

23 августга ўтар кечаси Москва-Ситидаги биноларнинг яна бирига дрон келиб урилди. Шаҳар мэри Сергей Собяниннинг хабар беришича, «атрофдаги иккита беш қаватли биноларнинг ҳам деразалари тўкилиб кетган». Унинг сўзларига кўра, жабрланганлар йўқ. Етказилган зарар кўлами ҳисоблаб чиқилмоқда.

Бахмут яқинидаги украиналик миномётчилар