Россия учун диверсия тайёрлаганликда айбланаётган украиналик Германияга топширилди

Швейцария Германияга украинлик Евгений Б.ни топширди — уни Россия ҳокимияти топшириғига кўра портлашлар тайёрлаганликда гумон қилишмоқда. Май ойида ГФРда шу иш бўйича яна икки украинлик — Владислав Т. ва Даниил Б. ҳибсга олинган эди.

Фото: Uwe Anspach/dpa/picture alliance

Германияда Украина фуқароси Евгений Б. ҳибсга олинди. У Россия давлат органлари топшириғига кўра жосуслик ва диверсиялар тайёрлашда айбланмоқда. Германия федерал прокуратураси хабар беришича, у жорий йил май ойида Швейцариянинг Тургау кантонида қўлга олинган ва 23 декабр, сешанба куни ГФРга топширилган. Прокуратура украиналиклар гуруҳи қўлга олингани ҳақида илк бор 14 май куни хабар берилганини эслатди. Ўшанда Кёлн ва Констанцда Владислав Т. ва Даниил Б. қамоққа олинган. Шу билан бир вақтда Германия Евгений Б.ни ҳибсга олиш бўйича ордер ҳам чиқарган эди.

Немис тергови фикрича, айбланувчилар Россия буюртмасига кўра Германияда юк транспортини ёқиб юбориш ва портлатишларни амалга оширишни режалаштирган. Хусусан, улар ГФРдан Украинадаги қабул қилувчиларга портловчи ёки ёнғин чиқарувчи қурилмалар солинган посилкаларни юборишни кўзлаган, бу посилкалар ташиш жараёнида портлаши керак бўлган, деб хабар қилган эди прокуратура. Ташиш йўналишларини разведка қилиш учун, айтилишича, Владислав Т. 2025 йил март ойи охирида Кёлнга иккита “синов” посилкасини жўнатган, улар ичида бошқа нарсалар қатори GPS-трекерлар ҳам бўлган.

Терговни Германиянинг федерал жиноий ишлар идораси олиб бормоқда.

Тайёрлаган: Отабек Матназаров

#Россия #Германия #Украина