Мактаблардаги кадрлар хизмати ходимларига 16 миллиард сўм кам ойлик тўланган

Адлия вазирлиги тизимидаги Юридик хизмат кўрсатиш марказлари томонидан республикадаги 9 минг 758та умумий ўрта таълим мактабларидаги кадрлар хизмати ходимларига ойлик маош тўлаш амалиёти ўрганиб чиқилган.

Ўрганишда 9 минг 787та кадрлар хизмати ходимлари штат бирликларида ишлаётган 9 минг 937 нафар (0,5 ставка ҳам қўшиб ҳисоблаганда) ходимлар маошлари қамраб олинган бўлиб, уларнинг 911 нафари олий маълумотли, 9 минг 26 нафари олий маълумотга эга бўлмаган мутахассислар экани аниқланган.

Вазирлар Маҳкамасининг 2019 йил 6 сентябрдаги 743-сон қарорига кўра, давлат бюджети маблағлари ҳисобига сақланадиган ташкилотларда олий маълумотли ходимларнинг лавозим разрядлари – 7-разряд, олий маълумотли бўлмаган ходимларнинг лавозим разрядлари – 6-разряд этиб белгиланган бўлса-да, ўрганиш давомида аксарият туман ва шаҳар халқ таълими бўлимлари томонидан мактаблардаги кадрлар бўлими ходимларининг меҳнатга ҳақ тўлаш бўйича лавозим разрядлари паст белгилангани маълум бўлган.

Хусусан, 160та ҳолатда 2-разряд, 1 минг 353та ҳолатда 3-разряд, 48та ҳолатда 4-разряд, 4 мингта ҳолатда 5-разряд, 4 минг 160та ҳолатда 6-разряд ва 216та ҳолатда 7-разряд этиб белгиланган.

Ходимларнинг меҳнатга ҳақ тўлаш бўйича лавозим разрядлари асоссиз пасайтирилиши натижасида жами 16 млрд сўмга ойлик маошлар кам тўланган.

Қўшимча қилинишича, ҳозиргача адлия бўлимлари томонидан кўрилган чоралар натижасида 3 млрд сўм тўлаб берилган ва қолган қисмини ҳам ундириш чоралари кўрилмоқда.

«Қонунчиликка зид равишда кам иш ҳақи тўлаш ҳолатлари юзасидан ҳудудий адлия органлари томонидан 1 минг 832та таъсир чоралари киритилиб, унга кўра 6 минг 38 нафар ходимнинг лавозим разрядини мувофиқлаштириш сўралган.

Ҳозирда ҳудудий адлия органлари томонидан судларга тегишли даъво аризалари киритилиб, кам ҳисобланган ойлик маошларини тўлатиб бериш чоралари кўрилмоқда», – дейилади вазирлик хабарида.

Маълумот учун, 2021 йил 1 октябрдан республиканинг барча ҳудудида Адлия вазирлиги тизимида Юридик хизмат кўрсатиш марказлари ташкил этилган бўлиб, марказлар туман (шаҳар) миқёсидаги давлат ташкилотларига юридик хизмат кўрсатиш билан шуғулланиб келмоқда.