Телеграм канали админлари товламачилик қилгани учун қўлга олинди, канал ёпилди

Телеграм мессенжеридаги «Namanganliklar» ва «Namangan-cars» каналлари админлари О.Т., М.А. ҳамда Ж.Б. ўзаро тил бириктирган ҳолда Наманган шаҳридаги «Соҳил» кафеси раҳбаридан товламачилик йўли билан 600 АҚШ доллари олаётган пайтда қўлга олинган.

Воқеа тафсилотларига кўра, аввалдан ёлланган бир гуруҳ аёллар кафега кириб, овқатдан таракан чиққанини айтиб жанжал қилишган, буни видеога олишган ҳамда видеони «Namanganliklar» канали админига олиб бориб беришган.

Канал админлари эса ўз каналида 100 минг аъзо борлиги, агар видеони каналга чиқарса, мижозлар ошхонага келмай қўйиши ҳақида қўрқитиб, кафе эгасидан пул талаб қилишган.

Кафе эгаси тегишли ташкилотларга хабар бергандан сўнг, товламачиликда гумон қилинаётган админлар 600 АҚШ долларини олаётган пайтда қўлга олинган.

Ҳозирда суриштирув ишлари олиб борилмоқда.

Ўша каналдаги охирги хабар шу:
«Namanganliklar kanali bugundan e'tiboran noqonuniy faoliyat olib borganligi sababli óz faoliyatini tugatdi.»