Фарғона шаҳар ИИБ, ижарачи ва опа-сингил иши: қамоқ муддати узайтирилди

Фарғона вилояти ИИБ томонидан товламачиликда айбланиб, қамоққа олинган Маҳлиё Умаровани қамоқда ушлаб туриш муддати 5 ойга қадар узайтирилди. Бу қамоқда ушлаб туриш муддати ҳали тугамай туриб амалга оширилди. Жиноят иши тергови Фарғонадан аввалига Тошкент шаҳри Миробод тумани ИИБга, сўнгра Тошкент шаҳар ИИББга ўтказилган. Аммо қамоқда сақланаётган М.Умарова ҳамон Фарғона вилояти ИИБда қолмоқда.

Жиноят ишлари бўйича Фарғона шаҳар суди товламачиликда айбланаётган Маҳлиё Умаровани қамоқда ушлаб туриш муддатини узайтирди. Суднинг бу борадаги ҳужжати 2025 йил 10 ноябр куни чиқарилди.

Жиноят ишлари бўйича Фарғона шаҳар суди томонидан Маҳлиё Умарованинг яқин қариндошларига жўнатилган хабарномада келтирилишича, уни қамоқда сақлаш муддати 2025 йил 10 ноябрдан 5 ойга қадар узайтирилган.

Маҳлиё Умаровага Жиноят ишлари бўйича Фарғона шаҳар судининг 2025 йил 22 августдаги ажрими билан қамоққа олиш тарзидаги эҳтиёт чораси қўлланганди.

Жиноят-процессуал кодексининг 245-моддасига кўра, жиноятлар тергов қилинаётганда қамоқда сақлаб туриш муддати кўпи билан уч ойни ташкил этади. Ушбу тартиб бўйича Умаровани қамоқда сақлаб туриш муддати 2025 йил 22 ноябр куни тугаши керак эди. Аммо ушбу муддат ҳали тугамасдан туриб аёлни қамоқда сақлаш муддати узайтирилган.

Қамоқда сақлаб туришнинг белгиланган уч ойлик муддатини беш ойгача узайтириш имкони Қорақалпоғистон Республикаси прокурори ёки вилоят, Тошкент шаҳар прокурори ва уларга тенглаштирилган прокурорларнинг илтимосномасига биноан суд томонидан кўриб чиқилади.

Маҳлиё Умарова ва унинг опаси Моҳинур Холиқназаровага нисбатан товламачилик бўйича жиноят иши қўзғатилган. Опа-сингил фуқаро Назокат Шукуровани “машинада Қува тумани ҳудудида жойлашган “Каркидон” сув омбори яқинидаги овлоқ жойга олиб бориб, машина ичида зўрлик ишлатиб, уйини фарзандларига қўшиб ёқиб юбориш билан қўрқитган ҳолда пул талаб қилган”ликда гумонланмоқда.

Аввалроқ Kun.uz ҳолат юзасидан суриштирув ўтказганди. Унда Моҳинур Холиқназарова бу жиноят иши Фарғона шаҳар ички ишлар бошқармаси бошлиғи Алишер Ашуровнинг адовати туфайли уюштирилганини билдирганди.

Гап шундаки, олдинроқ Маҳлиё Умарованинг ёниб кетган машинаси сабаб Алишер Ашуров унинг “жим юриши” учун 10 минг доллар тўлаб берган.

Моҳинур Холиқназарова Назокат Шукуровадан аслида ўзининг пулини сўраганини, Шукурова Қува туманидаги танишидан пул олиб беришини айтиб, машинага ўзи минганини айтганди. У 2025 йил 20 август куни гўёки Назокат Шукуровадан пулини олиб бериш алдови билан ИИБ биносига чақиртирилиб, шу ернинг ўзида тезкор тадбир ўтказилган ҳолда ушланган.

Моҳинур Холиқназаровани ушлашда Алишер Ашуровнинг укаси Ойбек Ашуров иштирок этган. У ИИБ тезкор ходими вазифасида ишлайди. Жиноят иши терговини Фарғона вилояти ИИБ терговчиси Нурмуҳаммад Ашуров олиб борган. Алишер Ашуровнинг қариндоши экани айтиладиган бу ходим Моҳинур Холиқназаровага “гарчи меҳнат таътилида бўлса ҳам, уларнинг иши учун атай келганини” айтган.

Kun.uz иккинчи томонни ҳам тинглаш мақсадида Назокат Шукурова билан ҳам боғланганди. Аммо у таҳририятнинг интервю бериш ҳақидаги таклифини ҳозирда “аҳволи оғирлиги”ни айтиб, рад этди. Шукуровага кўра, Моҳинур ва Маҳлиё исмли аёллар унга туҳмат қилган ва “ўлдириб юбориш билан қўрқитиб”, тилхат ёздириб олган. Шукурова Фарғона вилояти ИИБда жиянлари ишлашини айтиб, опа-сингил ички ишлар ходимлари устидан ҳам ёзаётганини билдирганди.

Kun.uz суриштирувидан сўнг Фарғона вилояти ИИБ ҳолат юзасидан расмий муносабат билдирди. Аммо унда ёнган автомобил, унинг ўрнига берилган 10 минг доллар ҳамда Ашуровлар учлиги ҳақида лом-мим дейилмади: жабрланувчи экани айтилаётган Назокат Шукурованинг интервюси билан чекланган.

Маълумот учун, ушбу жиноят иши тергови Фарғона вилоятидан Тошкент шаҳар Миробод тумани ИИБга ўтказилганди. Маълум бўлишича, тергов эндиликда Миробод туманидан Тошкент шаҳар ИИББга ўтказилган. Аммо тергов Тошкент шаҳрига ўтказилгани билан Маҳлиё Умарова Фарғона вилояти ИИБда ушлаб турилибди.