Россия дронлари яна Украинадаги ҳарбий комиссариатларга ҳужум қилмоқда

Россия ҳарбийлари 7 июл куни Харкив ва Запорижжя шаҳарларидаги ҳудудий тўлдириш ва ижтимоий қўллаб-қувватлаш марказлари (Украинада бу военкомат муқобили) биноларига дронлар билан зарба берди, деб хабар берди Украина қуролли кучлари қуруқликдаги қўшинлари қўмондонлиги.

Запорижжядаги ҳарбий комиссариат биносига берилган зарба натижасида бир аскар яраланган, Харкивда уч киши жароҳатланган. Маҳаллий расмийлар Запорижжя 20 киши, жумладан, икки ҳарбий, Харковда эса 33 киши яралангани ҳақида хабар берган.

Расмийларга кўра, Харкивда Холоднигор районига зарба берилган: маъмурий бинолар, беш қаватли турар жой биноси шикастланган, иккита автомобил ва яна бир турар жой биноси ёниб кетган. 7 июлга ўтар кечаси ҳам шаҳарга дронлар ҳужуми уюштирилди. Жами 66 киши, жумладан, олти нафар бола жабрланган. Саккиз нафар жабрланувчи касалхонага ётқизилган. Бир киши ҳалок бўлган.

Запорижжяда таълим муассасасининг ётоқхоналари, кўп қаватли ва хусусий уйлар, нотурар бинолар шикастланган.

Россия мудофаа вазирлиги ҳужумни тан олиб, Россия дронлари Украина қуролли кучларининг ҳарбий комиссариатларини «аниқ нишонга олгани» ҳаиқда маълум қилган.

Россия қўшинлари июн ойи охири – июл ойи бошидан бери Украина ҳарбий комиссариатларига зарба бериб келмоқда. 30 июн куни Россия дронлари Кривий Риҳдаги ҳарбий комиссариат биноси яқинига қулагани, уч киши жароҳатлангани ҳақида хабар берилганди. 3 июл куни Украина қуролли кучлари қуруқлик қўшинлари қўмондонлиги Россия дронлари ҳужумидан сўнг Полтавадаги ҳудудий тўплаш маркази биносида ёнғин бошлангани ҳақида хабар берди. Полтава областининг Кременчуг шаҳридаги яна бир шундай бино 6 июл куни зарбага учради.

Россия ҳужумлари фонида Лвив областидаги ҳарбий комиссариат биносида хавфсизлик чоралари кучайтирилди, дея хабар берди «Суспільне» манбаси. Хусусан, муассасага кириш жойида қўриқлаш кучайтирилган.

Винницадаги ҳарбий комиссариатнинг фейсбук саҳифасида муассаса «мамлакатдаги кескин вазият туфайли» асосий манзилдаги фаолиятини тўхтатгани ҳақида хабар пайдо бўлди. Кейинроқ идора постни ўчириб, янгисини эълон қилди. Унда айтилишича, Винница области ҳарбий комиссариати шахсий таркиби хавфсизлик мақсадида «тарқоқ ҳолда» жойлаштирилган. Изоҳланишича, биринчи постдаги маълумотлар «ташқи аралашув натижасида таҳрирланган», шунинг учун ўчириб ташланган.

Украина қуролли кучлари Россия Федерациясининг Украинадаги ҳарбий комиссариатлар биноларини нишонга олаётганини сафарбарликни бузишга уриниш билан боғлади. «Душман армиямизга ҳарбий хизматчиларнинг оқиб келишидан жуда қўрқади», – деди 6 июл куни Украина қуролли кучлари қуруқликдаги қўшинлари қўмондонлиги спикери Виталий Саранцев. Унинг сўзларига кўра, зарбалардан олдин бир қатор миналашлар ва ҳарбий комиссариатлар биноларига портловчи қурилмаларни олиб киришга уринишлар кузатилган.