Трамп: Путин тинчликни истаяпти, келишувга Зеленский тўсқинлик қиляпти

Украинада тинчлик келишуви тузилишига Москва эмас, Киев тўсқинлик қиляпти, деди АҚШ президенти Доналд Трамп Reuters агентлигига берган интервюсида. Интервью 14 январ, чоршанба куни эълон қилинган. Трампнинг сўзларига кўра, Россия президенти Владимир Путин урушни якунлашга тайёр, Украина эса “келишув тузишга нисбатан камроқ тайёр”.

АҚШ раҳбаридан: “Нима учун АҚШ раҳбарлигидаги музокаралар ҳалигача Иккинчи жаҳон уруши тугаганидан бери Европадаги энг йирик можарони ҳал қила олмади?” — деб сўралганда, Трамп: “Зеленский”, — деб жавоб берган, бироқ тафсилотларни очиқламаган.

Reuters’нинг 2025 йил декабр ойида манбаларга таяниб хабар беришича, АҚШ разведкаси баҳосига кўра, Владимир Путин тинчлик истаги ҳақида омма олдидаги баёнотларига қарамай, ҳали ҳам Украина ҳудудининг тўлиқ назоратини ўрнатишга интилмоқда.

Reuters манбаларининг айтишича, АҚШ разведкаси хулосалари кўп жиҳатдан Европа махсус хизматлари баҳолари билан ҳам мос келади.

Германия ташқи ишлар вазири Йоханн Вадефул декабр бошида Россия президенти Украина билан тинчлик музокараларини бошламаслик учун изчил равишда баҳоналар қидираётганини айтган. “Шунинг учун ҳам мен унинг умуман тинчлик музокараларига жиддий ёндашяпти, деб ўйламайман”, — деган ФРГ ТИВ раҳбари.