Тошкент шаҳрининг янги герби танловига тақдим этилган ишлар намойиш этилади

Тошкентнинг ижтимоий ҳаётида биринчи маротаба шаҳарнинг янги рамзи (герби) учун ошкора​ ва очиқ​ тарзда танлов бўлиб ўтди, деб хабар бермоқда Тошкент шаҳар ҳокимияти қошидаги Жамоатчилик кенгаши ​ахборот хизмати.

2018 йил 16 июль куни Тошкент шаҳар ҳокимияти қошидаги Жамоатчилик кенгаши ташаббуси билан 2018 йил 17 сентябргача давом этган Тошкент шаҳрининг рамзи(герби)ни ишлаб чиқиш бўйича очиқ профессионал танлов эълон қилинганди. 

«Таъкидлаш жоизки, пойтахтнинг янги гербини ишлаб чиқиш ғояси шаҳримиз ҳаётини янада замонавий ва қулайроқ қилиб бораётган ижобий ўзгаришлар билан жуда ҳамоҳанг. Танлов бўйича низом ва техник топшириқлари Тошкент шаҳар ҳокимлигининг toshkent.uz ва Жамоатчилик кенгаши сайтларида, шунингдек, ижтимоий тармоқларида жойлаштирилди», — дейилади ахборотда​.

Маълум қилинишича, танловда иштирок этиш учун тасвирий санъат, дизайн, график, иллюстрасия, реклама ва шунга ўхшаш фаолият йўналишларининг махсус таълим ёки профессионал тажрибага эга мутахассислари жалб этилди. Танловда иштирок этиш учун алоҳида таклифномалар Ўзбекистон Бадиий Академиясининг барча аъзоларига, республиканинг етакчи дизайнерлари ва чет элда фаолият юритувчи ватандош-мутахассисларга юборилди.

Юборилган ишларни танлаб олиш, танловнинг мукофотланувчи ғолиблари ва асосий ғолибини аниқлаш мақсадида Ўзбекистон Бадиий Академиясининг тўрт нафар академиклари, санъатшунослар, гералдика йўналишидаги мутахассислар (шу жумладан, Ўзбекистон Республикаси герби муаллифи Анвар Мамаджанов), рассомлар, дизайнерлар ва жамоатчилик вакилларини ўз ичига олган комиссия тузилди.

Kun.uz'га маълум бўлишича, танловда иштирок этиш учун 310 та лойиҳа ва таклифлар тақдим этилди. Танловда 118 нафар рассом ва дизайнерлар иштирок этишди.

Танловни ташкил қилиш бўйича барча ишлар Жамоатчилик кенгаши томонидан ихтиёрий равишда жамоат учун амалга оширилди. 
Барча юборилган ишлар муҳокама қилгандан сўнг мутахассислар танлов финалистларини аниқладилар. Якуний бешликнинг орасидан энг яхши лойиҳа танланди ва у январь ойида Халқ депутатлари Тошкент шаҳар кенгашига муҳокама учун тақдим этилди. Депутатлар муҳокамадан сўнг фуқароларнинг фикрини билишни тавсия қилдилар ва барча фикрлар Тошкент шаҳар ҳокимияти томонидан энг яхши лойиҳани тасдиқлаш жараёнида мутлақо эътиборга олинади.

Шу мақсадда, Тошкент шаҳар, Мустақиллик, 6 манзилидаги «Китоблар олами» китоб мажмуасида иштирокчиларнинг тақдим этган ишлари кўргазмаси бўлиб ўтмоқда ва ушбу тадбир танловнинг якуний натижаларининг эълон қилиниши, финалистлар ва энг яхши лойиҳа муаллифини тақдирлаш маросими билан якунланади.