Исроил: Трампнинг Ғазо бўйича Тинчлик кенгашини Николай Младенов бошқаради

Болгариялик сиёсатчи ва БМТнинг Яқин Шарқ бўйича собиқ элчиси Николай Младенов АҚШ президенти Доналд Трамп томонидан Ғазо бўйича Тинчлик кенгаши бош директори лавозимига танланди.

Ушбу тайинлов 8 январь куни Исроил бош вазири Бинямин Нетаняҳу томонидан эълон қилинди. Associated Press нашрининг ёзишича, тайинлов АҚШ расмийси томонидан ҳам тасдиқланган.

Младенов АҚШ воситачилигида сулҳнинг кейинги босқичида Ғазо секторини бошқариш вазифаси юклатилган, лекин ҳали синовдан ўтмаган халқаро тузилманинг энг юқори лавозимли расмийсига айланди.

Сулҳ битимига кўра, Трамп раислик қиладиган бу орган – янги технократик фаластинликлар ҳукумати устидан назоратни, Ҳамасни қуролсизлантиришни, халқаро хавфсизлик кучларини жойлаштиришни, Исроил қўшинларининг қўшимча чекинишини ва секторни қайта қуришни назорат қилиши керак.

Reutersʼнинг ёзишича, 9 январь куни Николай Младенов босиб олинган Ғарбий Соҳилдаги Рамаллаҳда Фаластин маъмуриятининг юқори мартабали расмийси Ҳусайн аш-Шайх билан ҳам учрашди.

Икки томон «Ғазо секторидаги вазият, иккинчи босқичга ўтиш йўллари ва (Трамп) режасини амалга ошириш механизмлари»ни муҳокама қилган. Трамп режасига кўра, охир-оқибат Ғазо устидан назорат Тинчлик кенгашидан Фаластин маъмуриятига ўтади.

«Мўътадил ва кутилган шахс»

53 ёшли Младенов узоқ вақтдан бери Яқин Шарқ сиёсати билан шуғулланиб келади ва минтақадаги жараёнлар бўйича мустаҳкам тажрибага эга.

У Болгариянинг собиқ мудофаа ва ташқи ишлар вазири бўлиб, кейинчалик 2013–2015 йилларда БМТнинг Ироқ бўйича махсус вакили, 2015–2020 йилларда эса БМТнинг Яқин Шарқ бўйича тинчлик элчиси бўлиб ишлаган. У бу лавозимда Исроил ва ҲАМАС ўртасидаги чегарадош зўравонликни юмшатишга ва музокаралар ғоясини сақлаб қолишга ёрдам берган.

Яқин Шарқ сиёсати бўйича эксперт ва собиқ дипломат Милен Керемедчиевнинг AP нашрига айтишича, Младеновнинг тайинланиши унинг тинчлик йўлидаги катта ҳиссаси натижаси: у Исроил ҳамда фаластинликларнинг ишончини қозонган.

«Болгария узоқ вақтдан бери мўътадил давлат сифатида қабул қилинади ва айниқса кескин бўлган бу можарода ҳаддан ошишдан тийилиб келган,» деди Керемедчиев. У Младенов ташқи ишлар вазири бўлган пайтда Яқин Шарқ масаласида доимо мувозанатли ёндашувни сақлаганини қўшимча қилди.

«Бу ёндашув араб дунёси томонидан ҳам, Исроил давлати томонидан ҳам ижобий қабул қилинган. Болгариянинг позицияси анъанавий равишда мувозанатли бўлиб келган ва у бу позицияни қатъий ҳимоя қилган,» деди таҳлилчи.

Младенов билан ишлаган исроиллик собиқ дипломат Алон Бар ҳам у билан ишлаш «алоҳида завқ» бўлганини айтди. Барнинг айтишича, Исроилнинг БМТ билан мураккаб муносабатлари фонида бу лавозим жуда қийин, бироқ Младенов Исроил ишончини қозона олган.

Бундан ташқари, Яқин Шарқдаги тинчлик саъй-ҳаракатлари учун 2021 йил февралида Младенов Фаластин президенти томонидан бериладиган Қуддус орденининг Катта юлдузи билан тақдирланган.

Ҳозирда Младенов БААда яшайди ва «Anvar Gargash» дипломатик академиясига раҳбарлик қилади.