Ўзбекистон ва Афғонистон электр энергияси етказиб бериш бўйича қиймати 100 млн долларлик шартнома имзолади

Маълумот берилишича, шартномада 2 млрд кВт/соат электр энергияси етказиб берилиши кўзда тутилган.

Фото: Anadolu Agency

Ўзбекистон ва Афғонистон 2022 йилда электр энергияси етказиб бериш бўйича қиймати 100 млн долларлик шартнома имзолади. Бу ҳақда Онадўлу агентлиги Da Afghanistan Breshna Sherkat энергетика компаниясига таяниб хабар берди.

Хабарга кўра, шартнома Da Afghanistan Breshna Sherkat (DABS) ижрочи директори Ҳафиз Муҳаммад Амин ва «Ўзбекистон миллий электр тармоқлари» АЖ раиси Дадажон Исақулов томонидан имзоланган.

Шартнома қиймати 100 млн доллар атрофида бўлиб, 2 млрд кВт/соат электр энергияси етказиб берилиши кўзда тутилган.

DABS делегацияси Ўзбекистонга ташрифи чоғида «Сурхон — Пули — Хумри» электр узатиш линияси лойиҳаси қурилишини ҳам муҳокама қилган.

Хабарда айтилишича, Афғонистон делегацияси Ўзбекистон билан тўхтатиб қўйилган лойиҳалар бўйича ҳамкорлик қилиш ва лойиҳалар хавфсизлигини таъминлашга ваъда берган.

Тайёрлаган: Дилшод Аскаров

#Афғонистон #Ўзбекистон #электр энергияси