«Ўзсувтаъминот» бошқарув раиси соҳадаги муаммоларни ишчиларнинг маоши камлиги билан изоҳлади

Вазир ўринбосари сўнгги пайтларда соҳада жуда катта ишлар амалга оширилаётганини таъкидлар экан, шу пайтга қадар бу тизим эътиборсиз қолиб кетганини айтиб ўтди.

«Коммунал соҳадаги энг кам иш ҳақи айни шу сув таъминоти тизимида эканлигини кўриш мумкин. Чунки тарифлар жуда паст эди, энди аста-секин кўтаряпмиз, лекин шундаям бошқа давлатлар билан солиштирганда бу тарифлар анча арзон. Бу соҳада яхши мутахассислар ишлаши учун уларнинг маошларини ҳам яхши қилиб бериш керак», дея унинг сўзларини келтирмоқда Kun.uz мухбири.

Вазир ўринбосарининг сўзларига кўра, малакали мутахассислар тайёрлаш учун бир нечта ОТМлар билан ҳамкорлик йўлга қўйилмоқда. Тизим учун мутахассис тайёрлайдиган 3та коллежларда ҳам етишиб чиқаётган кадрлар салоҳиятига эътибор бериляпти. Лекин соҳадаги асосий муаммо ўрта қатламда фаолият кўрсатувчи кадрларда келиб чиқяпти.

2020 йилда Корея давлати билан келишган ҳолда ушбу кадрлар салоҳиятини ва малакасини ошириш мақсадида Ўзбекистонда сув академиясини очиш кўзда тутилган. Уларга геоинформацион тизим билан ишлаш, сув йўқотишларни аниқлаш каби сўнгги технологиялар қисқа муддатли малака ошириш курсларида ўргатилади.

Шу билан бир қаторда, Франциянинг йирик компанияси билан ҳам ҳамкорлик йўлга қўйилади. Соҳиб Саифназаров ташкил этиладиган малака ошириш курсларининг сифатига эътибор қаратилиши лозимлигини таъкидлади.

«Мазкур курсларда ўқиган мутахассисларга сертификат берилади. Сертификатга эга бўлган ходимлар маошига қўшимча ҳақ олишлари мумкин бўлади. Бу эса уларнинг ишга муносабатини ўзгартиради», деди у.

Сув таъминоти ва канализация объектлари қурилиши бўйича янги тизим жорий этилиши айтилган эди.

Маълумот учун 2021 йилда ичимлик суви ва канализация тармоқлари тортиш, сув объектлари қуриш учун 1,1 трлн сўм маблағ ажратилади.