«Нефтчи» жазоланди, ҳакамни тепган футболчи 10 йилга четлатилди – ЎФА Фарғонадаги ўйин бўйича қарор қабул қилди

Маълум қилинишича, ҳакамнинг кўкрак қисмига бутсасининг таг қисми билан зарба берган «Нефтчи»нинг 98-рақамли футболчиси Жамшид Тўрақулов 10 йил муддатга футбол билан боғлиқ ҳар қандай фаолиятдан четлаштирилган. Шунингдек, клуб вакиллари Ш.Aбдураимов, С.Зокиров ва Ж.Қобулов 15 миллион сўмдан жаримага тортилган. «Нефтчи» ҳужумчиси Достон Тошматов 10та ўйинга дисквалификация қилинган. «Нефтчи» клуби эса 100 миллион сўм жаримага тортилди ва 3та ўйинни мухлиссиз ўтказадиган бўлди.

«Учрашув якунлангандан сўнг мухлислар футбол майдонида ва унга ёндош ҳудудларда тартибсизликлар келтириб чиқаргани, «Нефтчи» футбол клуби масъуллари жамоат тартибини сақлаш билан боғлиқ етарлича чоралар кўрилишини таъминламагани учун «Нефтчи» футбол клубига нисбатан Интизом кодексининг 5.4-бандига асосан 3та уй учрашувини мухлисларсиз ўтказиш ва 100 миллион сўм миқдорида жарима интизом чораси қўлланди.

Учрашувдан сўнг стадионга ташриф буюрган томошабинлар томонидан футбол майдонида ва унга ёндош ҳудудларда тартибсизликлар келтириб чиқарилиши ҳолатини муҳокама қилиш ҳамда «Истиқлол» стадиони маъмуриятига чора кўриш бўйича Фарғона вилояти Ички ишлар бошқармасига тақдимнома юборилди», дейилади ЎФА хабарида.

Эслатиб ўтамиз, 1 декабрь куни Про-Лига 20-туридан ўрин олган «Нефтчи» – «Турон» ўйинидан кейин «Нефтчи» футболчилари ва мухлислари учрашувни бошқариб борган Шавкат Насибуллаевга ташланиб, уни калтаклашганди. Бу жанжал сабаб 5 киши 15 суткага қамалган, шунингдек, 6 кишига жиноят иши очилганди.

Жанжалдан кейин «Нефтчи» Суперлигага йўлланма берувчи «Андижон»га қарши ўтиш ўйинида қатнашмаслиги ҳақида миш-мишлар пайдо бўлди, лекин ЎФА баёноти «Нефтчи» Про-Лиганинг иккинчи вакили сифатида Суперлигага ўтиш ўйинида қатнашишини кўрсатмоқда.