Канада божлар киритиладиган АҚШ маҳсулотлари рўйхатини эълон қилди 

Канада молия вазирлиги божлар киритиладиган АҚШ маҳсулотлари рўйхатини эълон қилди.  

Ушбу чоралар АҚШ президенти Дональд Трампнинг импорт қилинувчи пўлат ва алюминийга 25 ва 10 фоиз бож киритиш қарорига жавоб чора ҳисобланади. Канаданинг бу чоралари АҚШдан импорт қилинувчи 12,6 млрд долларлик маҳсулотларни қамраб олади. 

Импортнинг йирик бандларига божлар киритган Трампдан фарқли, Канада аниқроқ ҳаракат қилишга қарор қилди. 25 фоиз бож солинадиган АҚШ маҳсулотлари рўйхатига 44 та турдаги, 10 фоиз бож солинадиганига эса 84 та турдаги маҳсулот кирган.

25 фоиз бож солинадиган маҳсулотлар рўйхатига темир, пўлат, қувурлар, рельслар, сим ва бошқалар киритилган. 10 фоизлик бож эса озиқ-овқат маҳсулотлари, жумладан йогурт, қаҳва, қулупнай жеми, хантал, майонез, шўрвалар, шоколад, гўштдан тайёрланган тайёр тушликлар, идиш-товоқ, қоғоз маҳсулотлар, ухлаш қопчалари ва пиво учун бочкаларга киритилади. Шунингдек, бу тоифага алюминийдан тайёрланадиган кўплаб маҳсулотлар киради.  

Божлар 1 июлдан киритилади.