«Буни барча ОАВ ёзиб чиқди». Украинада округ қўмондони ўринбосари ҳалок бўлгани тасдиқланди

Россия телевидениесидаги пропаганда ток-шоусида асосий мавзу НАТОнинг Вилнюсдаги шоуси бўлиб қолган бўлса-да, Ольга Скабеева бошловчилик қиладиган «60 минут» кўрсатувининг навбатдаги эфирида Россия қўшинлари оккупацияси остидаги Бердянск шаҳри Storm Shadow ракеталари билан ўққа тутилгани мавзусига ҳам тўхтаб ўтилди. «Мудофаа вазирлигидан расмий маълумот йўқ. Аммо деярли барча ОАВ аллақачон ёзиб бўлди...», – дея шарҳлади телебошловчи.

«Ҳа, – деди унга жавобан Россиянинг Украинага босқинидан кейин Россия телевидениесидаги асосий спикерлардан бирига айланган генерал-лейтенант Гурулев. – У ўтган йилда жуда оғир яраланган, уни базўр олиб чиқишган ва аслида соғлиги ҳолати туфайли у бугун фронтга бора олмасди, уни ҳисобдан чиқариш мумкин эди. У деди: йўқ, йигитлар, мен у ўша ерда бўламан ва яна нацистлар билан жанг қилиш учун кетаман. Афсуски, у қаҳрамонларча ҳалок бўлди, бу инсон катта ҳурматга лойиқ, қуролли кучларда обрўси жуда баланд эди ва бу ҳақиқат».

Гурулев шу тариқа нафақат Олег Цоков ўлими фактини, балки ушбу генерал 2022 йил сентябрида жиддий жароҳат олгани ҳақида ўтган йил украин манбаларида тарқалган хабарларни ҳам тасдиқлади.

Цоков Бердянскда ҳалок бўлгани тўғрисида илк бор 11 июл тонгида Украинанинг Россия томонидан оккупация қилинган Мариупол шаҳри мэри маслаҳатчиси Петро Андрюшченко хабар берган, унинг ортидан бу маълумот қатор украин телеграм-каналларида тарқалганди.

Цоковнинг ўлими ҳақидаги дастлабки хабарлар у қадар ишончли кўринмаганди, чунки у яқин вақтгача раҳбарлик қилиб келган 144-дивизия Луҳанск областидаги Лиман йўналишидаги ҳарбий ҳаракатларда иштирок этмоқда. 2022 йил сентябрида ушбу тузилма ҳарбий хизматчилари Украина қуролли кучларининг Харкив областидаги қарши ҳужуми вақтида қуршовга тушиб қолишига бир бахя қолганди, кейинги ойларда эса уларнинг фронт чизиғидаги ҳаракатлари билан боғлиқ хабарлар фақат Луҳанск областидан келган – бу ҳақда россияликларнинг машҳур «Рыбарь» телеграм-канали ҳам, «Информационное сопротивление» гуруҳидан бўлган украиналик ҳарбий таҳлилчи Константин Машовец ҳам ёзган. Шунингдек, бригада ҳарбий хизматчиларининг бир қисми Беларусдаги полигонларда экани тўғрисида ҳам хабарлар бўлган.

Июн ойи ўрталарида 144-дивизия ҳарбий хизматчилари Луҳанск областининг Креминна шаҳри яқинида жиддий йўқотишга учраган бўлиши мумкинлиги ҳақида хабар тарқалганди, уларни ўшанда 20-армия қўмондони, генерал Сухроб Ахмедовнинг нутқини тинглаш учун бир жойга тўплашганди, аммо генерал келишидан олдин улар Украина қуролли кучлари томонидан ўққа тутилади.

«Военный осведомитель» телеграм-канали (600 мингдан ортиқ обуначиси бор) 11 июл куни Цоковнинг ўлими ҳақида хабар бериб, шундай аниқлик киритди: «Британиянинг Storm Shadow қанотли ракеталари билан 58-армиянинг Бердянск ҳудудидаги ички қўмондонлик пунктига зарба берилиши оқибатида Жанубий ҳарбий округ қўмондони ўринбосари генерал-лейтенант Олег Цоков ҳалок бўлди».

Цоков Жанубий ҳарбий округ қўмондони ўринбосари лавозимига кўтарилгани тўғрисида Россия мудофаа вазирлиги хабар бермаганди. Аммо ҳарбий ҳаракатлар шароитида вазирлик Россия армияси раҳбарлик таркибидаги ўзгаришлар ҳақида ёки умуман хабар бермайди ёки бу ҳақда анча кейинроқ, ҳисобот матнлари орасида хабар қилинади. Энди аён бўлишича, Цоков чиндан ҳам кўтарилган ва шу туфайли Луҳанск областида эмас, Бердянскда ишлаётганди.

11 июл куни эрталаб маҳаллий манбалар Бердянск бўйлаб давомли ракета зарбалари йўлланганини хабар қилганди. Маҳаллий аҳоли вакилларининг сўзларига кўра, зарбалардан бири Бердянск шаҳрининг Тенистый бульвар, 22 манзилида жойлашган «Дюна» меҳмонхонасига келиб тушган. Афтидан, 58-армиянинг қўмондонлик пункти айнан шу ерда жойлашганди.

Айни вақтда Цоков – ҳарбий ҳаракатлар ҳудудида ҳалок бўлган энг юқори лавозимли россиялик ҳарбийга айланди. 2022 йил июнида Луҳанск областида ҳалок бўлган 1-армия корпуси қўмондони Роман Кутузовга генерал-лейтенант даражаси ва «Россия Қаҳрамони» юлдузи ўлимидан кейин берилган.

2022 йил майида эса Попасная яқинида захирадаги генерал-майор Канамат Боташев бошқарувида бўлган Су-25 самолёти уриб туширилганди. Боташев «Вагнер» ХҲК ёлланма жангчиси сифатида ҳарбий ҳаракатларда иштирок этаётганди.

Украина томони босқин бошланганидан буён ўндан ортиқ россиялик генераллар ўлими ҳақида хабар берган, аммо бу хабарларнинг кўп қисми ёки расман тасдиқланмаган ёки кўнгиллилар ҳалок бўлгани айтилган ҳарбий бошлиқларнинг қабрларини топа олишмаган.

Шу билан бирга, Россия мудофаа вазирлиги учун ўз йўқотишлари борасида сукут сақлаш, гарчи гап генерал мақомидаги юқори мартабали офицерлар ҳақида борса ҳам, одатий амалиётдир. Хусусан, 13 июн куни оккупация ҳукумати расмийси Владимир Рогов ўз телеграм-каналида 35-армия штаби бошлиғи, генерал-майор Сергей Горячевнинг ўлими ҳақида хабар берганди.

Сергей Шойгунинг вазирлиги эса Горячевнинг ўлими ҳақидаги хабар юзасидан ҳеч қандай изоҳ бермади ва унинг ўлими фактини тасдиқламади. 20 июн куни Петербургдаги «Фонтанка» нашри Литейний проспектидаги Офицерлар уйида Горячев билан видолашув маросими ҳамда унинг Петербургдаги Смоленск қабристонидаги қабри фотосуратини намойиш этди.

Генерал-лейтенант Цоков икки чечен урушида қатнашган, Россиянинг Суриядаги амалиётларида ҳам иштирок этганди.