ТИВ раҳбари: Венгрия Киевга дизел етказиб беришни тўхтатяпти

Венгрия Украинага дизел ёнилғиси етказиб беришни тўхтатмоқда. Бу ҳақда Венгрия ташқи ишлар вазири Петер Сийярто чоршанба куни, 18 февралда X ижтимоий тармоғида маълум қилди.

«Дружба» нефт қувури орқали Венгрияга нефт транзити тикланмагунча, етказиб беришлар қайта тикланмайди», — деб таъкидлади у.

Вазирнинг айтишича, Украина президенти Володимир Зеленский нефт транзитини «сиёсий сабаблар туфайли тикламасликка қарор қилган ва Венгриянинг энергия таъминотини атайлаб хавф остига қўйган». Шу билан бирга, Сийярто қўшимча қилишича, Будапешт Украина энергия хавфсизлигини таъминлашда муҳим рол ўйнайди: Украинага газ, электр энергияси ва дизел ёнилғиси импортининг катта қисми Венгриядан ёки унинг орқали кириб келади.

«Бизнинг ўз энергия таъминотимиз хавф остида турган пайтда, бошқа мамлакатнинг энергия хавфсизлигига кафолат беришимизни кутмаслик керак. Энергетика соҳасидаги ҳамкорлик ўзаро бўлиши ва босимга эмас, ҳурматга асосланиши шарт», — дейилади баёнотда.

Украина ташқи ишлар вазири Андрей Сибиха «Дружба» нефт қувури орқали етказиб беришлар 27 январдан тўхтаганини Венгрия Украина ҳудудидаги қувур участкасига Россия зарбаси берилгани ҳақидаги фактни яшириб келгани билан изоҳлади. Бунга жавобан Будапешт украин томони гўёки қувурнинг ўша қисмида электр таъминотини ўчириб қўйганини билдирди. Словакия бош вазири Роберт Фицо 15 феврал куни Украинани экспортни қайта тиклашни атайлаб чўзяпти, деб айблаган.

Reuters агентлиги ёзишича, Венгриянинг MOL энергетика компанияси Будапештдаги ҳукуматга стратегик нефт захираларидан фойдаланишга рухсат беришни сўраб мурожаат қилган. Компания маълум қилишича, агар шарқдан етказиб беришлар яқин кунларда тикланмаса, биринчи босқичда тахминан 250 минг тонна хом нефтни захирадан чиқариш талаб этилади.

ExPro таҳлил компанияси маълумотига кўра, 2025 йилда Украина «Дружба» нефт қувурининг жанубий тармоғи орқали тахминан 9,73 млн тонна Россия нефтини транзит қилган.