Кремль Путиннинг Трамп билан суҳбатини ижобий баҳолади

Россия президенти матбуот котиби Дмитрий Песков Путиннинг Трамп билан суҳбати «ҳақиқатан ҳам жуда ижобий бўлганини ва бу ҳақда икки президент айтганини» таъкидлади.

«Бу келишув вариантларини излаш йўлида биргаликда ишонч билан ҳаракат қилиш имконини берадиган суҳбатдир», деб қўшимча қилди Кремль вакили.

Нега президентлар матбуот анжуманида журналистларнинг саволларига жавоб бермагани ҳақида гапирар экан, Песков «баёнотлар батафсил бўлганини» айтди.

«Шунинг учун якуний матбуот анжуманида журналистларнинг саволларидан воз кечишга қарор қилинди», деб қўшимча қилди у.

Россия президентининг махсус вакили Кирилл Дмитриев Путин ва Трамп ўртасидаги учрашув якунлари бўйича «ижобий ва конструктив мулоқот бўлиб ўтганини» айтди.

Шунингдек, у АҚШ президенти «Москва ва Вашингтон ўртасида иқтисодий соҳада катта салоҳият борлигини» таъкидлагани муҳимлигини маълум қилди.

Трамп ва Путин 15 август куни Аляскада учрашди, якунда ҳеч қандай келишув бўлмади. АҚШ ва Россия президентлари Анкориждаги ҳарбий базада музокара олиб борди. Музокаралардан сўнг, Путин ва Трамп матбуот вакиллари олдига чиқиб, ўз баёнотларини ўқиб эшиттирди. Шундан сўнг президентлар журналистларнинг саволларига жавоб бермасдан зални тарк этди.