АҚШ ва Хитой ўртасида савдо таранглиги: томонлар Малайзияда музокара ўтказади

Reuters агентлигининг хабар беришича, АҚШ Хитой маҳсулотларига 100 фоизлик бож киритишидан олдин музокара ўтказади. Бессент бу ҳақда Оқ уйда ўтказилган йиғилишда маълум қилган. Хитой вице-премери Хе Лифенг билан телефон орқали гаплашиб, учрашув режаси тасдиқланганини билдирган. Молия вазири ижтимоий тармоқ Хʼда “АҚШ ва Хитой ўртасидаги савдо масалалари юзасидан очиқ ва батафсил музокаралар олиб бордик”, - деб ёзган.

Sinxua агентлигининг хабар беришича, томонлар икки давлат иқтисодий ва савдо алоқаларининг асосий масалалари бўйича “очиқ ва конструктив” мулоқот ўтказган. Улар имкон қадар тезроқ янги савдо музокараларини бошлашга келишиб олган.

Reuters’нинг ёзишича, Бессент ва Хе илгари олти ой давомида Европанинг бир неча шаҳрида учрашиб, ўзаро тарифларни пасайтириш бўйича вақтинчалик келишувга эришган эди. Бу келишувнинг муддати 10 ноябрда тугайди.

Малайзияда бўлиб ўтадиган янги учрашув Жануби-Шарқий Осиёда жойлашган ва АҚШ ҳамда Хитой билан фаол савдо қилувчи мамлакатда ўтказилиши билан аҳамиятли. Трамп ҳозирда Малайзиядан келтириладиган товарларга 19 фоиз бож жорий қилган, шунингдек, яримўтказгич ва электрон қурилмаларга 100 фоизгача тариф солиш билан таҳдид қилган.

Трамп Пекинни “сўнгги келишмовчилик учун” айблаб, Хитойнинг нодир ер элементлари экспортига қўйилган янги чекловларини танқид қилган. Агар Пекин бу чекловларни бекор қилмаса, у 1 ноябрдан бошлаб Хитой импортига қўшимча 100 фоиз бож жорий қилишини айтган.

Бессент ва АҚШ савдо вакили Жеймисон Грир бу чекловларни “глобал таъминот занжирларига хавф солувчи ҳаракат” деб атаган.

Трамп, шунингдек, икки ҳафтадан сўнг Жанубий Кореяда Хитой президенти Си Жинпинг билан учрашишини тасдиқлаган. “Биз Хитой билан келишамиз деб ўйлайман, лекин бу битим адолатли бўлиши керак”, деган Трамп Fox Business каналига берган интервюсида.

Аввалроқ АҚШ президенти Доналд Трамп томонидан янги йирик божлар эълон қилиниши ортидан Хитой Вашингтонни икки томонлама стандартларда айблаганди.

Ўтган ҳафтада Трамп Хитойнинг нодир металлар экспорти устидан назоратни кучайтиришига жавобан Хитойга нисбатан қўшимча 100 фоизлик тарифларни эълон қилганди. Нодир элементлар Пекин ва Вашингтон ўртасидаги савдо қарама-қаршилигида асосий муаммо бўлиб қолмоқда. Хитой Савдо вазирлиги ушбу материалларни қазиб олиш ва қайта ишлаш билан боғлиқ технологиялар бўйича қатъий экспорт назоратини эълон қилди. Эндиликда компаниялар нодир тупроқ металларини ишлаб чиқаришда қўлланадиган асбоб-ускуналар ва технологияларни экспорт қилишдан олдин рухсат олиши керак. Хорижий фирмалар учун қўшимча чекловлар мавжуд.