Фарғонада ҳоким ўринбосари экология инспекторига куч ишлатди

Фарғона вилоятининг Бувайда туманида ҳоким ўринбосари экология инспекторига куч ишлатди. Бу ҳақда Экология қўмитаси раиси маслаҳатчиси Расул Кушербаев хабар берди.

Маълум бўлишича, Бувайда туманида экология инспектори Аҳроржон Ниёзов аҳоли мурожаатига асосан манзилга бориб, ноқонуний дарахт кесиш ҳолатини аниқлаган. Сўнгра дарахтларни кесаётган шахсни тўхтатиб, белгиланган тартибда ҳужжатларни расмийлаштирмоқчи бўлган.

Воқеа жойида бўлган Бувайда тумани ҳокими ўринбосари Саидали Хизиров эса экология инспекторига куч ишлатиб, уни четроққа олиб чиқишга уринган. Хабарда ҳоким ёрдамчиси миллий гвардия ходимлари ёрдамида инспекторни туман ИИБга олиб кетгани айтилади.

Ижтимоий тармоқларда тарқалган видеода экология инспектори дарахт кесаётган шахснинг қўлидаги аррани тортиб олганини кўриш мумкин. Ушбу шахс дарахт кесмаётгани, балки бутаётганини айтган. Бироқ видеода дарахт кесилгани яққол кўринган. 

Шундан сўнг ҳоким ўринбосари атрофдаги ишчиларга экология инспекторининг қўлига ўтган аррани олиб қўйишни буюради. Бунга жавобан экология инспектори ҳоким ўринбосарига қонуний фаолиятига босим ўтказишга ҳаққи йўқлигини айтиб эътироз билдирган. Мулозим эса унга жисмоний куч ишлатиб, четроққа судраб кетган.

Воқеага ички ишлар ходимлари гувоҳ бўлиб турган.

Фарғона вилояти ИИБ ҳолат юзасидан расмий муносабат билдирди. Унга кўра, Бувайда туманида ноқонуний дарахт кесилаётганлиги билан боғлиқ хабарлар Фарғона вилоят ИИБ томонидан ўрганиб чиқилган. Шу билан бирга, экология инспектори ИИБга олиб келингани ҳақидаги ахборот ҳақиқатга тўғри келмаслиги қайд этилган.

«Ҳозирда Фарғона вилоят ҳокимлиги ҳамда ҳуқуқни муҳофаза қилувчи органлар томонидан тузилган ишчи гуруҳ Бувайда тумани ҳокимлиги вакилларининг хатти-ҳаракатларига ҳуқуқий баҳо бериш бўйича ўрганиш ишларини олиб бормоқда», дейилади вилоят ИИБ расмий муносабатида.

Фарғона вилояти ҳокимлиги эса ҳолат юзасидан вилоят ҳокими ўринбосари Ҳ.Долимов бошчилигида ишчи гуруҳ тузилиб, жойига ўрганиш учун юборилганини маълум қилди. Ўрганиш якунлари юзасидан ҳолатга қонуний баҳо берилиши қўшимча қилинган.

Фарғона вилояти Экология бошқармаси ҳам ҳолат юзасидан расмий муносабат билдирган.

«Ижтимоий тармоқларда Бувайда тумани Найман қишлоғида зовур атрофидаги дарахтлар ноқонуний равишда кесилаётгани ҳақидаги хабарлар юзасидан Фарғона вилояти прокуратураси, вилоят Экология, атроф-муҳитни муҳофаза қилиш ва иқлим ўзгариши бошқармаси Бувайда туман бўлими давлат инспекторлари ҳамда ИИБ 2-минтақавий ҳудуд патруль-пост хизмати ходимлари томонидан шу куннинг ўзида назорат рейд тадбирлари ўтказилди», дейилади муносабатда.

Рейд давомида туманнинг Найман МФЙ ҳудудидаги зовур атрофида ноқонуний дарахт кесиш ҳолати тасдиқланган. 26 тўп кам қимматли дарахтнинг қонунга хилоф равишда кесилгани аниқланган. Унга Маъмурий жавобгарлик тўғрисидаги кодекснинг 79-моддаси 1-қисми бўйича баённома тузилиб, 10,3 миллион сўм жарима ҳамда 45,8 миллион сўмлик атроф-муҳитга етказилган зарар ҳисоблаб чиқилган.

Бошқарма мазкур ҳаракатни қаттиқ қоралаб, мансабдор шахслар қонуний жавобгарликка тортилиши учун чоралар кўрилишини маълум қилган. Шу билан бирга, ҳодиса вақтида инспекторга босим бўлганига тўхтаб ўтилмаган.