Тошкент шаҳар ҳокими дарахтлар кесилишига муносабатини айтди

Шавкат Умрзоқовнинг фикрича, дарахтлар “заруратсиз кесиб ташланган” бўлса, бу салбий, лекин дарахтлар “халқ манфаати кўзланган лойиҳа” йўлида кесилган бўлса, “тарозига битта дарахтни олиш керак эмас”. “Халқ манфаати қаерда юқори бўлса, шуни кўриш керак”, дейди пойтахт ҳокими.

Фото: Gazeta

Тошкент шаҳар ҳокими Шавкат Умрзоқов Gazeta мухбирининг: “Шаҳарда дарахт кесилса, ичингизда нима ўтади?” деган саволига жавоб берди.

“Касалланмаган бўлса, заруратсиз кесиб ташланган бўлса, ёки шахсий эҳтиёжга боғланган бўлса, албатта, менинг фикрим салбий. Лекин зарарланган дарахтни олиб ташлашми, ёки бирон бир бундан ҳам яхши лойиҳани амалга ошириш учун шароит яратиш, экология ёки халқ манфаати кўзланган лойиҳа бўлса, албатта, тарозига битта дарахтни олиш керак эмас... Халқ манфаати қаерда юқори бўлса, шуни кўриш керак.

Худога шукр, дарахт экадиган жойларимиз кўп, экологик муҳитни яхшилайдиган ишларимиз тури кўп, шуларни амалга ошираверишимиз керак. Битта дарахт кесилиб қолса, яхши эмас, лекин уни трагедия қилишимиз керак эмас”, – деган шаҳар ҳокими.

Умрзоқов давлат хизматчилари ва мансабдорлари қачон жамоат транспортида юриши ҳақидаги саволга ҳам жавоб берган.

“[Амалдорлар ҳам] жамоат транспортида юради, [қачонки] жамоат транспортига чиқиб, ишга кечикмасдан, ярим соат – 40 дақиқада етиб оладиган имконият бўлса, ўшанда жамоат транспортига ўтади. Мен ўйлашимча, бу [жамоат транспортини ривожлантириш] – капитал ҳажми катта лойиҳа, лекин ўйлайманки, 3–5 йилларда эришиб оламиз”, – деган у.