Австралиядан бошпана сўраган эронлик футболчилардан бири фикрини ўзгартирди

Осиё кубогида иштирок этиш учун келган Эрон аёллар жамоасининг яна икки вакили (бир футболчи ва штабнинг яна бир ходими) Австралиядан бошпана сўради. Натижада ватанига қайтмасликка қарор қилган эронликлар сони етти нафарга етди.

Улар ўйиндан олдин миллий мадҳияни куйлашдан бош тортишганди ва ватанида уларни «сотқинлар» деб эълон қилишди.

Аммо кейин улардан бири Эронга қайтишга қарор қилган бошқа футболчилар билан мулоқотдан кейин ўз қарорини ўзгартирган. 

Австралия ички ишлар вазири Тони Бёркнинг маълум қилишича, у Эрон элчихонаси билан алоқага чиққан ва турган жойини маълум қилиб қўйган. Натижада қолганларни бошқа хавфсиз жойга кўчиришга тўғри келган. «Мен дарҳол футболчиларни бошқа жойга кўчиришни буюрдим ва бу дарҳол амалга оширилди», – дейди Бёрк.

Вазир Австралия ҳукумати бу унинг «ўз қарори бўлганига ишонч ҳосил қилгани»ни қўшимча қилган. «Австралияда одамлар фикрини ўзгартириш ҳуқуқига эга, одамлар эркин ҳаракатланиш ҳуқуқига эга. Биз унинг якуний қарорини ҳурмат қиламиз», – деган у.

Бёрк Сидней аэропортида 10 март куни кечқурун уйга учишдан олдин ҳар бир футболчи алоҳида хонага олиб кирилгани ва бошпана сўраш ҳақида ўйлаб кўриш таклиф қилинганини ҳам айтган. Уларни шошилтиришмаган, тазйиқ ўтказишмаган. Бёркнинг сўзларига кўра, баъзилар бу масалани муҳокама қилиш учун Эрондаги оила аъзоларига қўнғироқ қилишган, аммо улар орасида Австралияда қолишга қарор қилганлар бўлмаган.