Мирзиёевнинг Марказий Осиё давлатлари бўйича махсус вакили лавозими таъсис этилади

Марказий Осиё давлатларининг хавфсизликни таъминлаш ва минтақавий муаммоларни бартараф этишдаги ўзаро муносабатларида ишонч даражаси оширилади. Бу ҳақда 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Фаол инвестициялар ва ижтимоий ривожланиш йили”да амалга оширишга оид Давлат дастури лойиҳасида айтилган.

Қайд этилишича, бу борада тегишли норматив-ҳуқуқий ҳужжат лойиҳаси ишлаб чиқилади. Лойиҳада:

Марказий Осиё давлатларининг минтақавий ҳамкорликнинг долзарб масалалари бўйича қарашларини яқинлаштириш, минтақада хавфсизлик, барқарорлик, яхши қўшничилик ва ҳамкорликни шакллантиришга қаратилган Ўзбекистон ташқи сиёсатини фаоллаштириш;

Ўзбекистон Республикаси Президентининг Марказий Осиё давлатлари билан ҳамкорликни ривожлантириш бўйича махсус вакили лавозимини таъсис этиш назарда тутилади.

Бажариш муддати - 2019 йил 20 июль, ижро учун масъуллар - ТИВ, ДХХ, Стратегик ва минтақалараро тадқиқотлар институти.