Навоийда институтга киритишини айтиб фуқародан 2000 доллар олган ўқитувчи ушланди

Навоий давлат педагогика институтига ўқишга киритиб қўйишни ваъда қилиб, фуқародан 2000 АҚШ доллари олган ўқитувчи ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги Департамент ҳамда ДХХ Навоий вилояти бошқармаси томонидан ўтказилган тезкор тадбирда, Навоий давлат педагогика институти катта ўқитувчиси А.Х. ушланган. У фуқаро С.ни «Мусиқа таълими» йўналиши бўйича ўтказиладиган кириш амалий имтиҳонларидан муваффақиятли ўтишини танишлари орқали ижобий ҳал қилиб бериш эвазига яқин қариндоши Т. орқали 2 000 АҚШ долларини фирибгарлик йўли билан олганлиги аниқланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.