Бразилиядаги футбол учрашувида 23 та қизил карточка кўрсатилди

Бразилиянинг Белу-Оризонти шаҳридаги стадионда бўлиб ўтган «Крузейро» ва «Атлетико Минейро» клублари учрашуви анча вақтгача мухлислар ёдида қоладиган бўлди – голлар ёки хавфли вазиятлар эмас, ўйин охирида майдонда кечган тартибсизлик туфайли. Минейро лигаси финалининг сўнгги дақиқаларида жамоа футболчилари ўртасида шиддатли тўқнашув юзага келди, бош ҳакам эса нақ 23 нафар футболчига қизил карточкасини кўрсатди.

Барчасини дарвозабон бошлади

Ушбу клублар ўзаро ўйинда Минейро лигаси ғолиби номини аниқлашди. Ўйиннинг 60-дақиқасида «Крузейро» форварди Кайо Жорже Жерсоннинг узатмаси орқали ҳисобни очди.

«Атлетико Минейро» қолган ярим соат давомида ҳисобни тенглаштира олмади. Жамоанинг бирорта зарбаси ҳам рақиб дарвозаси томон тўғри бормади. Натижада ўйин охирида футболчилар асабларини жиловлай олишмади.

Барча ҳакам ҳуштаги чалинишини кутиб турганида «Крузейро» сўнгги ҳужумни уюштирди, ҳужум охирида ушбу клуб яримҳимоячиси Кристиан «Атлетико Минейро» дарвозабони Эверсонга бориб урилди. Тўпга биринчи бўлиб улгурган дарвозабонга рақибнинг ҳаракати ёқмади: у аввалига курашга хос услуб қўллаб, Кристианни оёғидан ушлаб йиқитди, кейин эса унинг устига чиқиб олиб, тажовузкор ҳаракатларини давом эттирди.

Шундан кейин икки жамоа футболчилари, шунингдек, захира ўриндиғидагилар ҳамда мураббийлар штаби аъзолари воқеа жойига етиб келишди. Майдонда оммавий муштлашув бошланди.

Натижада томонларни ажратиш учун майдонга ҳарбий полиция кучлари тушиб келган.

«Аралашув хавфсизлик хизмати мажбуриятларининг бир қисми ҳисобланади. Протоколда ҳакамлар бригадаси хавфсизлигини таъминлаш шартлиги кўрсатилган ва бу иш бажарилди», – дейилади ҳарбий полиция баёнотида.

Бир неча дақиқадан кейин футболчилар тинчланишган, учрашув эса «тулкилар»нинг минимал ҳисобдаги (1:0) ғалабаси билан якунланган. Ўйин бош ҳаками эса 23 футболчига қизил карточка кўрсатди: шундан 12 нафари «Крузейро», 11 нафари «Атлетико» футболчилари. Бу борада бундан олдинги рекорд 1954 йилда «Ботафого» ва «Португеза» клублари ўртасидаги ўйинда ўрнатилган, ўшанда 22 кишига қизил кўрсатилганди.

Халк ҳам муштлашувда фаол қатнашди

Ўз вақтида «Порту» ва «Зенит» клублари сафида тўп сурган, ҳозирда «Атлетико Минейро» клуби аъзоси ҳисобланган Халк бу ўйинда Бразилия футболи тарихига кириши мумкин эди. У қаторасига тўрт йил мобайнида штат чемпионатининг энг яхши тўпурари бўлганди. Аммо 2026 йилда бу серия узилди: финалда у бирорта гол уролмади. Шу тариқа, у турнирнинг тўрт карра тўпурари бўлган бошқа бир футболчи Дада Марвилидан ўзиб кетолмади.

Шу билан бирга, Халк муштлашувдаги фаол иштироки билан мухлислар ёдида қоладиган бўлди. Камералар у рақиблардан бирини ортидан қувиб юриб ургани акс этган ҳолатни тасвирга олган. Унинг ўзи ўйиндан кейин барча жавобгарликни учрашув ҳаками зиммасига юклади.

«Ё ҳакам ўйинни ўз назоратига олади, ёки у тўлиқ тартибсизликка айланади. Мухлислардан узр сўрашимиз керак, бундай зўравонлик саҳналарини кўриш жуда ачинарли. Буни болалар ва ўсмирларга кўрсатмаслигимиз керак», – дея унинг сўзларини келтирган geglobo нашри.

Буёғига нима бўлади?

Айни вақтда КОНКАКАФ (Шимолий ва Марказий Америка ҳамда Кариб ҳавзаси футбол конфедерацияси) ҳеч қандай санкция ҳақида эълон қилмади – ташкилот ҳамон ҳодисани текширмоқда.

Журналист ва спорт ҳуқуқи соҳасига ихтисослашган Андрей Кампффнинг сўзларига кўра, футболчилар жиддий жазоланмайди

«Бундай ҳолатларда энг кенг тарқалган квалификация Бразилия спорт адлия кодексининг (CBJD) 254-а-моддаси бўлиб, у 4 дан 12 тагача ўйинга дисквалификацияни назарда тутади», – дея унинг сўзларини келтирган TEMPO Sport.

Бундан ташқари, Кампфф қайд этишича, жазо фақат штат ички чемпионатига тааллуқли бўлади. Шунинг учун, футболчилар Бразилия А серияси ўйинларида иштирок этавериши мумкин.