«Камбағал ва ишсиз фуқароларни тадбиркорликка жалб қилиш, уларнинг меҳнат фаоллигини ошириш ва касб-ҳунарга ўқитишга қаратилган ҳамда аҳоли бандлигини таъминлашга оид қўшимча чора-тадбирлар тўғрисида»ги президент қарори имзоланди.
Қарорга асосан, Ўзбекистон бўйлаб тўртта турдаги касб-ҳунарга ўқитиш муассасалари фаолияти йўлга қўйилади:
- Қорақалпоғистон Республикаси ва вилоятларда 14 та «Ишга марҳамат» мономарказлари (шу йил охиригача) — рўйхат;
- Қорақалпоғистон Республикаси, вилоятлар ва Тошкент шаҳрида Бандлик ва меҳнат муносабатлари вазирлиги тизимидаги 30та касб-ҳунарга ўқитиш марказлари (бир ой муддатда) — рўйхат;
- Тошкент шаҳрининг ҳар бир туманида биттадан, жами 11та қисқа муддатли касб-ҳунарга ўқитиш курслари (бир ой муддатда) — рўйхат;
- Ўзбекистон бўйлаб 136 та маҳаллада маҳалла аҳолисини касб-ҳунарга ўқитиш масканлари (икки ой муддатда) — рўйхат.
Бундан ташқари, хусусий касб-ҳунарга ўқитиш муассасалари ҳам ташкил этилиб, уларда меҳнат бозорида талаб юқори бўлган касблар, тадбиркорлик асослари ва хорижий тиллар ўқитилади. Бунда уларга:
- ўқув дастури ва ўқитувчиларни мустақил танлаш ҳуқуқи берилади;
- вазирликнинг «Ишга марҳамат» мономарказлари ва касб-ҳунарга ўқитиш марказларининг, касб-ҳунарга ўқитиш муассасаларининг бинолари ёки уларнинг бир қисми ҳамда ҳокимлик ва маҳаллалар тавсиясига кўра бошқа бўш турган бинолар ёки уларнинг бир қисми оператив бошқарувга ёки узоқ муддатли имтиёзли ижарага берилади;
- касб-ҳунарга ўқитиш марказлари бинолари бир қисми берилган тақдирда, мазкур марказларнинг ўқув жиҳозлари ва анжомларидан имтиёзли равишда фойдаланишга топширилади;
- нодавлат касб-ҳунарга ўқитиш муассасаларида Бандликка кўмаклашиш давлат жамғармаси ҳисобидан ўқитиш учун давлат буюртмасининг кафолатланган энг кам даражаси белгиланади.
Давлат ёрдами эвазига, нодавлат касб-ҳунарга ўқитиш муассасалари:
- ўқитиш ва баҳолаш сифати меҳнат бозори талабларига мос бўлишини таъминлайди;
- ишсиз, камбағал аҳолини касб-ҳунарга ўқитиш харажатларини Бандликка кўмаклашиш жамғармаси ҳисобидан тўланаётган давлат буюртмасининг миқдоридан оширмайди;
- касбий кўникмалари баҳоланаётган фуқаролар тўғрисидаги маълумотларни Тасдиқланган малакага эга шахслар миллий реестрига қўшиш учун тақдим этади.
Нодавлат касб-ҳунарга ўқитиш муассасаларида таълим олиб, WorldSkills ва бошқа халқаро стандартлар даражасида касбий малака сертификатини (Skills паспорти) олган битирувчиларга Бандликка кўмаклашиш давлат жамғармаси маблағлари ҳисобидан қуйидаги имтиёзлар берилади:
- касб-ҳунарга ўқиш ва малака имтиҳонини топшириш харажатлари қопланади;
- тадбиркорликка жалб этиш ва ўзини ўзи банд қилганлик учун рағбатлантириш субсидиялари ажратилади;
- ўз бизнесини бошлаши учун имтиёзли кредит ажратишга йўлланма берилади.
2021 йил 1 январдан бошлаб, «Ишга марҳамат» мономарказлари ҳамда касб-ҳунарга ўқитиш марказлари битирувчиларининг касбий малакасини WorldSkills стандартлари асосида баҳолаш йўлга қўйилади.
Баҳолашдан муваффақиятли ўтган битирувчиларга Ўзбекистон ва хорижда тан олинадиган Skills паспорти берилади.
Skills паспорти ўрта махсус, касб-ҳунар таълими дипломи даражасига тенглаштирилиб, эгаллаган билимларни меҳнат фаолиятида амалга ошириш ҳуқуқини беради, бироқ таълимнинг кейинги турини давом эттириш учун асос ҳисобланмайди.
Касбий малакаси тасдиқланган битирувчиларнинг ягона реестри тузилади.
