Халқаро пресс клубнинг Ўзбекистон президентининг Фарғона вилоятига ташрифига бағишланган сайёр сессиясида Савдо-саноат палатаси раиси Адҳам Икромов пандемиянинг давлат-тадбиркор муносабатларига таъсири хусусида тўхталиб ўтди.
«Пандемия жуда ёмон. Лекин у давлат органлари раҳбарларига, ҳуқуқни муҳофаза қилиш органларига, ҳокимликларга тадбиркорлар билан қандай ишлашни ўргатди. Тадбиркорнинг овозини, таклифини ҳар ерда эшитиш заруратини давр кўрсатди.
Шифокор касални даволагани билан ғурурланади. Ўқитувчи бир неча одамга таълим бергани билан ғурурланади. Тадбиркорнинг ғурури халққа манфаат келтириш, маҳсулот ишлаб чиқариш, муносиб иш билан таъминлаш билан белгиланади. Фарғона вилояти тадбиркорларида ҳам шундай ғурур бор», дея Адҳам Икромовнинг сўзларини келтирмоқда Kun.uz мухбири.
Сессия давомида маълум қилинишича, Фарғона вилоятининг ўзига хос хусусиятини инобатга олган ҳолда аҳоли яшаш шароитини яхшилашга қаратилган 11 трлн сўм қийматга тенг бўлган 913та лойиҳа шакллантирилган.
