Шота Руставели кўчаси 10 сентябргача очилади, лекин таъмир давом этади

Тошкентда реконструкцияга тушган Шота Руставели кўчасининг 2 ҳафтадан буён ёпиқ қолаётган қисми яқин кунларда очилади. Шундан кейин кўчани тўлиқ ёпмаган ҳолда, асфалт қопламасининг иккинчи қаватини ётқизиш ишлари бошланади. Лойиҳани тўлиқ якунлаш йил охиригача чўзилиши мумкин.

{Yii::t(}

Ўтказиб юбориш 6s

Ўтказиб юбориш

Тошкентнинг Яккасарой туманидаги Шота Руставели кўчаси янгиланяпти. Бу ерда Ўзбекистонда илк марта автобуслар учун кўча ўртасида жойлашган алоҳида бўлак ташкил этиляпти.

Реконструкция ишлари ёз аввалида бошланган эди. Ҳозирда 6,5 км узунликдаги кўчанинг Биродарлик қабристонидан Grand Mir меҳмонхонасигача бўлган 4 километрлик қисми салкам 2 ҳафтадан бери ёпиқ қолмоқда. Хўш, ўтган вақт давомида қандай ишлар қилинди, лойиҳа қачон фойдаланишга топширилади? Kun.uz мухбири шу каби саволларга жавоб излади.

“China State Construction” компанияси вакили, лойиҳа менежери Ву Донгюнга кўра, кўчанинг ҳозирда ёпиқ қолаётган қисми 10 сентябрга қадар очилади. Чоштепа кўчаси билан кесишмадан Биродарлик қабристонигача бўлган қисми эса йил охиригича битиши кутиляпти.

“Айни дамда умумий ишлар ҳажмининг қарийб 80 фоизи якунланган. Кўриб турганингиздек, ҳозир ободонлаштириш, ёритиш устунларини ўрнатиш ва йўл инфратузилмасининг якуний элементлари бўйича ишлар олиб бориляпти”, – дейди пудратчи.

Тошкент шаҳар ҳокимлиги матбуот хизмати раҳбари Гулноза Қосимова ҳам 10 сентябргача кўча очилишини маълум қилиб, автомобиллар бир муддат асфалт қопламасининг биринчи қатламидан юриб туришини айтди. 12 сентябрдан кейин асфалт қопламасининг иккинчи қаватини ётқизиш ишлари бошланади, лекин бу вақтда қатнов тўлиқ тўхтатилмайди: кўчанинг фақат асфалт ётқизилаётган қисмида ҳаракат чекланади. Таъмирлаш ишларида устуворлик дам олиш кунларига берилади, деди ҳокимият вакили.

Гулноза Қосимовага кўра, 6,5 километрлик кўчада велосипед йўлаклари ҳам қурилмоқда. Бу йўлак автомобил қатнов қисмидан 20-30 см баландроқ қилиб қуриляпти. Бундан ташқари, велойўлак ва автомобил йўлини ажратиш учун 20 см баландликда металл тўсиқ ўрнатилади.