Тошкентдаги автобусларда бугундан бошлаб кондиционерлар ёқилмоқда

7 майдан бошлаб Тошкент шаҳридаги автобуслар салонида кондиционерлар босқичма-босқич ишга туширилади. Бу ҳақда “Тошшаҳартрансхизмат” хабар берди.

Маълум қилинишича, ташқи ҳаво ҳарорати +28°C дан юқори бўлган ҳолларда автобус салонларида совитиш (кондиционер) тизимлари мажбурий тартибда ёқилиши керак. Бунда автобус салони ичидаги ҳароратни +26°C даражада сақлаш талаб этилади.

“Тошшаҳартрансхизмат” АЖ баёнотида қуйидагилар ваъда қилинган:

• кондиционери носоз автобуслар йўналишга чиқарилмайди;
• техник носозликлар қисқа муддатда бартараф этилади;
• барча ҳайдовчилар билан кондиционерлардан тўғри фойдаланиш бўйича навбатдан ташқари йўриқномалар ўтказилади.

“Йўловчилар томонидан билдирилаётган ҳар бир мурожаат эътибордан четда қолмайди ва кескин чоралар кўрилади. Вақтинчалик юзага келган ноқулайликлар учун йўловчилардан узр сўраймиз!” – дейилади компания ахборотида.

Мазкур баёнотдан олдин ижтимоий тармоқларда пойтахтдаги ҳамма автобусларда ҳам кондиционерлар ҳалигача ёқилмагани ҳақида эътирозлар пайдо бўлган эди.

Бу танқидларга “Тошшаҳартрансхизмат” билан бирга, Пойтахт транспорт бош бошқармаси ҳам муносабат билдирди. Бошқарма баёнотида айтилишича, ташқи ҳарорат +28°C дан ошганда барча автобусларда совитиш тизими узлуксиз ишлаши кераклиги юзасидан 30 апрел куни барча ташувчиларга кўрсатма-хат юборилган.

Қайд этилишича, мазкур кўрсатма талабларига риоя этмаган ташувчиларга нисбатан қатъий интизомий ва шартномавий чоралар кўрилади.